Godigo Nogi Ugwaba Sabo Tęąbi Po Wabo Buku Dabe 74:13-23

¹³Te nago bomode naga, nago te genuai tamu ąį togolama, tama me badu buga siyu, meba buga siyu elama, dolaluali. Tama nago te Isip we bidi dabe dolali. Augwali te tamu ąįde moni sųgų tiwai yalio.

¹⁴Tama nago te genuai pukpuk dabego tobolu aluali, te Isip tobolu bidi dabe da, tama nago agai tigi te augwali te kemi tǫ wa pai bulude bidibo uni hasa dabeba menama, tama augwa tuai dao.

¹⁵Nago te wę dabe te tǫde pedalumainu elama, tama te wę dabe tedu palio. Tama nago te genuai wę dabe tigidali mu sula somainu ilai dao.

¹⁶Nago te be posobo me be hulibo nigali, tama nago te giliga me polua te ugwadu muai elalubao.

¹⁷Tama nago te tigidali tǫgo dąį muanio. Tama nago te tigidali kibu bede giliga nanobo sogo muyu, te tulubage tulubo sogo muyu yai elalubo dao.

¹⁸Genuai Bidi, nago homu kone ebo me tagaligio. Te nago boi bidi dabego te posobo po nageba obao. Augwali te esela pabo kolesaga meni yai bidi tiwai eyu, tama augwa homugo nage te olo bage me tiwai da homu ebo dao.

¹⁹Te nago hani bage te augwali bomo meni yai. Tama tiyu, nago da tagalubaso, tama te boi bidi dabego daba te dwai sę mu elama mu dolaibao. Te boi bidi dabego te naga we bidi dabolo te dwai dene mabo sę ebao. Iya, nago da homu kone me gegeda paligio.

²⁰Te tigidali tǫ pedaide, te dago tǫde me te bidi dabego wabi hwį hwį pai. Tama tialima, nago da dali te dąų walali bomai po te homu kone ma palao.

²¹Nago te dwai bidi dabego te gasa bidi dabe agalama, tama augwali aiyaba mu elalumainu me sula tagaligio. Nago te magi doado meni yai te nai dabe sǫą pabo bidi dabe tau sobaso da, teda augwaligo te nago nogi ugwaba somainao.

²²God, nage aselama, te boi bidi dabe dali po bomo elama wagasao. Nago te hagoma ebo bidi dabego te tigidali sogo posobo po nageba wabo, te nago homugo koneao.

²³Te nago boi bidi dabego te genuai po dągą ola biliyu, nageba po dwai weyu ebao. Augwaligo te sesemane genuai i naga wabo dao. God, nago te augwaligo kolesagade homu kone me gegeda paligio.