Godigo Nogi Ugwaba Sabo Tęąbi Po Wabo Buku Dabe 74:1-13

¹God, magi baso nago da tudiba mubawe? Te nago wado po sesemane te naga we bidi daba ududa, agawe?

²Nago te naga hani bage dabolo te homu kone ma palao. Polobadu mu nago te naga we bidi da sa muai. Nago da ma abelama, tama da naga hani bidimainu yai. Nago te Saion bulu duba homu kone ma paliyu, te polobadu tede nage bidai dao.

³Te dago boi bidi dabego te dago moni lotu be tempelde doado bage tigidali dolalio. Te doado bage dolali elalubo, te nage aselama, suagasao.

⁴Te nago boi bidi dabego te tempel be selama, tama augwali te nago tedali te wiegi yai pesage elalubo madi tomode dolalu, tama augwaligo win yai da olama, i wali.

⁵Augwaligo te nago bede ni name togwali, te bidi dabego te buside ni togobo tiwai yalio.

⁶Te ni name dabe augwa nigilama, tama te wiegi yai nai dabego au ilai, te boi bidi dabego te sigi hwą me sęgę yai hamago aluai dao.

⁷Augwaligo te nago tedali wiegi yai be te siago ulali. Augwaligo te tedali wiegi yai pesage elaluali dolali, te nago we bidi dabego nageba lotu wabo madi, te dolai. Augwaligo aluama, tigidali mu dolai dao.

⁸Augwaligo te da mu dolabo homu yalio. Tama tialima, augwaligo te Godigo lotu be tigidali dago tǫde elalubo, te siago ulai.

⁹Te nago dabolo mani te tigidali sa muani nai, te augwaligo sela sąwanio. Tama dago profet megi me bidibeo. Te da me deligo te sęgę te mena sogo silabo, te dago me konebeo.

¹⁰God, nisu sogo naga te boi bidi dabego dabolo te posobo po udumainu yaibawe? Te augwaligo naga nogide te sesemane sogo po dwai omainu yaibawe?

¹¹Magi baso nago da tau sisąma ebawe? Magi baso nage odolali naga dulalubo dawe?

¹²Tiali goli God, polobadu mu nage dago king bidali, tama megi me nage dago king bidibao. Tama hauwa sogo nago da tau selama, tama da te hwįani digi da me dolobeo.

¹³Te nago bomode naga, nago te genuai tamu ąį togolama, tama me badu buga siyu, meba buga siyu elama, dolaluali. Tama nago te Isip we bidi dabe dolali. Augwali te tamu ąįde moni sųgų tiwai yalio.