Text copied!
CopyCompare
Godigo dwagi yai po buku - Godigo Nogi Ugwaba Sabo Tęąbi Po Wabo Buku Dabe - Godigo Nogi Ugwaba Sabo Tęąbi Po Wabo Buku Dabe 68

Godigo Nogi Ugwaba Sabo Tęąbi Po Wabo Buku Dabe 68:2-17

Help us?
Click on verse(s) to share them!
2Waligo te hano sela sąbo dao, te tama tiwai gilama naga Godigo te boi bidi dabe sela sąyu tiaibao. Siago te kandel ili posolo ilibaso, tama ili te wę tiwai pedelaibao. Te tama tiwai naga te dwai sę ebo we bidi dabe te augwali God gedude dolaibao.
3Tiali goli, te doloba pai bidi dabe da, te wiegi yai pemene elama, tama augwa te God gedude bugai haliga yaibao. Augwa te wiegi yai pemene umabo mu yaibao.
4Dago te Godigo nogi ugwaba sabo tęąbi po wao. Aga te pǫ dabede dugulasa, tama pabo dao. Agai sunumi dodolao. Aga nogi te Genuai Bidi dao. Dago aga gedude wiegi yai pemene yao.
5God te aga gasa wiegi yai bede bidiyu, tama agai te aga aya ida isai wai puluba dabe tonalubao. Tama agai te wilawe we dabe, te agai tau sabo dao.
6Agai te bidi me we agaduba deli bidibaso, te be menama, tama augwa tede bugagia bidimainu ebo dao. Tama agai te kalabus bidi dabe augwa te kalabus silimainu elama, tama augwa pesagede te bugagia bidimainu ebo dao. Tiali goli, te sę hagoma ebo bidi dabe, teda dwai pesageba mu bidigi paibao.
7God, polobadu te naga we bidi dabede nage poligi sulama, tama nago augwali odasa asiyu, tama nage te magi nai meni yai te tǫ wa pai bulude bilali.
8Te sogo te tǫ gęǫ elama, tama tulubage genuai aiyaba tulali, magi baso meni, God, nage asalio. Mu tama, te da Israel dabego God nage asobaso, tama te Sainai bulu du gęǫ umabo mu yai dao.
9God, nago te moni tulubage te naga tǫba tulumainu elama, tama nago te e tǫ dwali te wiegi yai ma pedalumainu ilai dao.
10Te naga we bidi augwali bidabo pesage te tǫde nigilama, bidai. Nage te wiegi yai mu, tama te nago te magi nai doado bage meni yai bidi dabe te nai mayu yai dao.
11Genuai Bidigo te aga we bidi dabeba po mawai, tama we hauwago te po pusugi pai.
12Te po e tama wali, “Te king dabe dali te tigidali ami dabe me, tigidali te wi palio,” po wai. Tama te augwa bidali pesagede bidali we dabego te augwa bidi dabego hwįyu sali doado bage te dobayalio.
13Te we dabe te silvago, me golgo te gasagi yai au mu elama, tama augwa te tonani te gasa wiegi yai ba sawi yai tiwai yali, tama aga te silvago ula tiwai yali, tama aga bogo te golgo gegemani ebo tiwai ebao. Tiali goli, magi baso bidi meba te sipsipgo obo tomode bidibawe?
14Te Tigidali Bomo Elalubo Godigo agai te king dabe te Salmon bulude sela sąnama, wi pelawali sogo, teda agai te talua ge ais tulubage te bulu duba tulumainu yai dao.
15Te Basango bulu du te moni bage mu dao. Aga te sau pado hauwa mu elalubao.
16Nage te sau pado hauwa dalubo bulu du da, magi baso nago te God aga dugulaluainu ebo bulu du sulama, tama nago homugo te olo nai tiwai da homu ebawe? Genuai Bidi da, te bulu dude bidada pidu, bidada paibao.
17Genuai Bidi te hwįbo bomai hauwa tausen karisde dugawali ami bidi dabe dali asaibao. Aga te Sainai bulu duba aselama, tama aga te gasa wiegi yai be mu tomoba bula sagasaibao.

Read Godigo Nogi Ugwaba Sabo Tęąbi Po Wabo Buku Dabe 68Godigo Nogi Ugwaba Sabo Tęąbi Po Wabo Buku Dabe 68
Compare Godigo Nogi Ugwaba Sabo Tęąbi Po Wabo Buku Dabe 68:2-17Godigo Nogi Ugwaba Sabo Tęąbi Po Wabo Buku Dabe 68:2-17