Godigo Nogi Ugwaba Sabo Tęąbi Po Wabo Buku Dabe 68:11-31

¹¹Genuai Bidigo te aga we bidi dabeba po mawai, tama we hauwago te po pusugi pai.

¹²Te po e tama wali, “Te king dabe dali te tigidali ami dabe me, tigidali te wi palio,” po wai. Tama te augwa bidali pesagede bidali we dabego te augwa bidi dabego hwįyu sali doado bage te dobayalio.

¹³Te we dabe te silvago, me golgo te gasagi yai au mu elama, tama augwa te tonani te gasa wiegi yai ba sawi yai tiwai yali, tama aga te silvago ula tiwai yali, tama aga bogo te golgo gegemani ebo tiwai ebao. Tiali goli, magi baso bidi meba te sipsipgo obo tomode bidibawe?

¹⁴Te Tigidali Bomo Elalubo Godigo agai te king dabe te Salmon bulude sela sąnama, wi pelawali sogo, teda agai te talua ge ais tulubage te bulu duba tulumainu yai dao.

¹⁵Te Basango bulu du te moni bage mu dao. Aga te sau pado hauwa mu elalubao.

¹⁶Nage te sau pado hauwa dalubo bulu du da, magi baso nago te God aga dugulaluainu ebo bulu du sulama, tama nago homugo te olo nai tiwai da homu ebawe? Genuai Bidi da, te bulu dude bidada pidu, bidada paibao.

¹⁷Genuai Bidi te hwįbo bomai hauwa tausen karisde dugawali ami bidi dabe dali asaibao. Aga te Sainai bulu duba aselama, tama aga te gasa wiegi yai be mu tomoba bula sagasaibao.

¹⁸God te ugwanu mu yai bulu duba holama, tama agai te kalabus bidi hauwa sela pai. Agai te hagoma ebo bidi dabego te aga dali hwįani bagego nogode te haniani wiegi yai nai sela peyu, aga dali pali. God, Genuai Bidi, te bulu dude bidaibao.

¹⁹Dago te Genuai Bidi nogi ugwaba sao. Tigidali side agai dago sęgę tolobo dao. God deligo naga da ma siyu ebo dao.

²⁰Dena Godigo digi te da tau siyu, tama da bugagia bidibao. God, dena Genuai Bidigo, te da tau sobaso, tama da me isibeo.

²¹Mu tama, Godigo te aga boi bidi dabe mu dolaibao, te dwai kolesaga sesemane wali pabo bidi dabe te tama tiaibao.

²²Genuai Bidigo te tama po wali, “Te eno dagego boi bidi dabe te Basande selama, ma odasa asaibao,” wali. “Tagalao te tamu ąi dologode mu bidibo, tede eno augwali ma odasa asaibao,” wai dao.

²³“Te dagego duga boi bidi dabeba te dwai dene mobaso, tama dage bugai haliga yagameo. Tama duga yowi dabego te boi bidi dabego kaneme te homu usu nama wali peyu, te kaneme tuaibao.”

²⁴God, me eno king, tigidali we bidigo suali, nago te hwįbode ugaba ela holama, tama nage wiegi yai pemene dali asobo suali. Tigidaligo nage te naga gasa tedali wiegi yai be tomoba soabo suai.

²⁵Te tęąbi wabo bidi dabe augwali poligi soali, tama te musik elibo bidi dabe augwali nosali asali, tama te dwasianu habidi elibo gesi wegi ogwa we dabe, augwali te tomodu palio.

²⁶Augwaligo tęąbi po te tama tiwai po wai, “Da Godigo we bidi, da sisinanio, tialima, dago te Godigo nogi ugwaba sao,” po wai. “Da te Israel hani dabe, dago te Genuai Bidi nogi ugwaba sao,” wai dao.

²⁷Te Benjamingo dwasianu hani dabe augwali polasa pai. Tama te Juda tobolu bidi dabe dali, te Juda we bidi dabe dali, augwali te Benjamin wali pai. Tama te Sebulungo tobolu bidi dabe me, te Naptaligo tobolu bidi dabe me, te augwali nosali pali.

²⁸God, nago te naga bomo dabolo ola mao. Polobadu nago te bomogo naga da tau sai dao.

²⁹Te king dabe nageba te wiegi yai olo maiyabo nai presen dabe seselama, tama nageba menama, te nago moni lotu be tempel te Jerusalemba mawai dao.

³⁰Nage te naga tempel bede bidiyu, tama nago te Isipba wado ilao, te uni hasa te wę pude bidibo tiwai ebao. Nago te we bidi hani dabe wado ilama, augwali te omai kibu bulmakau te augwa wai puluba dabe dali bidibo tiwai ebao. Te augwaliba wado iliyu, te augwaligo nageba kidu sugunama, tama augwa silva dabe te nageba momainao. Nago te hwįabo homu ebo we bidi dabe te sela sąyu, ela gudulao, tama augwa wi tedela pomainao.

³¹Te Isip kingo te polalubo bidi dabe te Jerusalemba tagala palama, te nago po odomainu yaibao. Tama te Itiopia dabego nogo ugwaba siyu, tama nageba gedu haluasa po waibao.