Godigo Nogi Ugwaba Sabo Tęąbi Po Wabo Buku Dabe 57:2-11

²Eno te Ugwadu Mu Bidibo Godigo te ena tau somainu i wabo dao. Tama agai te ena sǫą pabo nai tigidali mabo dao.

³Aga te dagalude bidiyu, tama agai eno gedu haluasa po wabo odama, tama ena ma dobola saibao. Agai te ena dolainu ebo bidi dabe te aiyaba elalueibao. Godigo te sesemane sogo ena wei mu eyu, godolo elama, tama agai ena munu me tagalugobeo. Mu menio.

⁴Te dwai hasa laion tiwai bidi dabe augwaligo ena bobegelali, tama augwaligo te we bidi dabe tuainu sisi yali. Te augwaligo kele te ene me sesemone poa pai mu tiwai elaluali. Te augwaligo hamena te bainat hwą poa pai mu tiwai elaluai dao.

⁵God, nago magi sę me deli te dagalude te tigidali we bidiba te tiwai ola mao, naga digi te polalubo bidi mu da olama, tama nage te augwali daide ugwadu bidibao. Te nago bomo te tigidali bulu tǫ pedaide pepeli diliba hanilama, pedalumainu yao.

⁶Te boi bidi dabego ena tola somainu ebo bono gągą muani. Tama tiyu, genuai sęgęgo ena aiyaba mu elaluai. Augwaligo eno sunumide te tǫ dedage dogolama, teba ena tula mumainu yai. Tiali goli, ena tula mubeo. Augwa digi te dedageba ma tulaluali.

⁷God, te eno haligade da, eno konealubo homu nageba dąų wali. Awe, eno konealubo homu nageba mu mubao. Tama tibaso, te eno nago nogi ugwaba sabo tęąbi po waibao.

⁸Te ena pila mubo tagalama hodaluaibao. Eno te gita me, kulelego me, te musik waibao. Te be posa pabode, teda eno te musik waibao.

⁹Genuai Bidi, te eno nageba usu da wabo po te gasa hani tomode waibao. Te ena tigidali tǫde bidibo we bidiba pelama, te nago nogi ugwaba saibao.

¹⁰Magi baso meni, nago da sesemane godolo ebo umabo mu ebao. Te dago usu sainu ebaso da, teda te dąį te dagaluba usu nigi paibao. Nago da tonaluabo po dąų walama, tama nago da me tagalubeo. Te nago da tonalubo sogo tigidali te dago nedebaso da, teda dąį te dagaluba usu nigiluaibao.

¹¹God, nago magi sę me deli te dagalude te tigidali we bidiba te tiwai ola mao, naga digi te polalubo bidi mu da olama, tama nage te augwali dąįde ugwadu bidibao. Te nago bomo te tigidali bulu tǫ pedaide te pepeli diliba hanilama, pedalumainu ilao.