Godigo Nogi Ugwaba Sabo Tęąbi Po Wabo Buku Dabe 44:1-15

¹Te Kora hani dabego asęani balia po me deli dao. God, te dago wąį nǫų dabego te nago polobadu bomai sę yali po te dabolo pusali, te augwali tǫde bidali sogo. Tama dena digi te po wabo odai dao.

²Nago digi te Israel hani isąwai bage te augwa tǫde sela sąnama, tama nago te tǫ te da Israel bagego wąį nǫų dabeba mani, tama augwali tede bomo elalu bidali. Nago te gasa hani dabego yali dwai kolesaga wei ponani, tiali goli nago te dena wąį nǫų dabe te bugagia bidimainu elama, tama hauwa umabo we bidi pedalumainu yai dao.

³Te wąį nǫų dabego hwįani, tiali goli augwaligo te tǫ te hwįnama me sabeo. Te augwa digi augwa bomogo te hwįbo tau selama, te boi bidi aiyaba me elalubeo. Menio. Nago augwali wei mu yali, tama tiyu, nage augwali dali bidiyu, tama augwaliba ula mani. Tama nago bomogo digi te boi bidi aiyaba elaluai dao.

⁴Nage eno king me eno God dao. Nago po obaso, tama te Jekopgo hanigo te boi hwįbode te boi bidi dabe aiyaba elalubo dao.

⁵Te nago bomogo naga dago te boi bidi dabe sela sąyu ebo dao. Mu tama, nage da dali bidiyu, tama dago te da dali hwįbo bidi dabe aiyaba elaluyu, sągągo agabo dao.

⁶Eno enesigi me ene elalubao, tiali goli eno homugo eno te hwįbode te nai dabego ena tau sabo homu me ebeo. Eno te bobobage bainat hwą elalubao, tiali goli tego me ena te hwįbode tau me sogobeo.

⁷Menio. Nago naga da tau sobaso, tama te boi bidi dabego da aiyaba me elalubeo. Te bidi dabego da wei me isąbadi, tiali goli nago augwali dali hwįnama, tama nago augwali aiyaba elaluai dao.

⁸God, sesemane sogo dago nago nogi ugwaba sobao. Tama dago nageba usu da weyu, geda haluasa po sesemane sesemane sogo wabo da.

⁹Tiali goli, megi da, magi yaliwe? Nago da tudiba munama, tama nago dago nogi aiyaba muani. Tama nage te dago ami bidi dabe dali te hwįboba me pabeo.

¹⁰Nago tama tibaso, tama da te boi bidi dabede wi sobadi, tama augwaligo te dago doado bage salio.

¹¹Nago da te augwaligo ela muabo kibu sipsip tiwai pedalumainu ilali. Tama nago da te dena tǫde bidali sela sąbaso, tama da tedela pelama, te gasa hani bage tomoba bidigi pai dao.

¹²Nago te naga we bidi te gasa haniba tagala palama, tama nago augwalide dwasianu mone mu sai. Nago te augwalide gasa ugwadu daganobo profit mone me sabeo.

¹³Nago dade te tiwai yali, tama te da pąde bidali hanigo te posobo po daba wali. Te we bidi dabego dwai gisugu mayu, tama dabolo hale ebo po wali.

¹⁴Nago te hani bage dabe homu hodolubaso, tama augwaligo dago nogide hale yabo po wabo dao. Te daba pedalubo sęde augwaligo dwai gisugu mabo sę ebao.

¹⁵Te bidi dabego posobo po, me dwai po enaba wali, tama te boi bidigo me te bidi dabego te dwai sę enaba wei ponobo eno suali. Tama ena sesemane sogo homu sęgę elalu, tama ena hale mu yai dao.