Godigo Nogi Ugwaba Sabo Tęąbi Po Wabo Buku Dabe 38:3-20

³Nago enaba wado ebaso, tama ena dwai gasi yai. Eno sęgę elalubaso, tama eno tigi bomo mu meni yai.

⁴Te ena sęgę dabego te ena mesegelama, tama te sęgę dabe te eno walu tolai sęgę tiwai elama, tama sęgę mu ebo dao.

⁵Te eno tigide elalubo kenide te keni bole hauwa elalu, tama te kugumini mu ebao. Eno te geda mubo kolesaga mu eyu, tama te sę enaba pedelai.

⁶Eno haligade te genuai sęgę mu elama, tama ena dolobao. Te tigidali side ena homu dene eyu, tama gela naga wabo dao.

⁷Eno tigi te posolo mu eyu, te siago dabo tiwai ebao, tama ena genuai gasi mu elalubao.

⁸Ena mu dolama, tama ena dwai bidali, te magi nai me deligo ena bomonama agabo tiwai gilama yali. Eno haligade te dwai homu mu yali, tama ena te genuai denede i me weyu yali.

⁹Genuai Bidi, nago te eno bomai homu wei ebo koneani. Eno haligago dwai gela wabo, tama nagede tebo te geme me dualalubeo.

¹⁰Te eno hoboludu sę bomo mu ebaso, tama eno bomo te mu sia salio. Te eno gedu hulia selama, tama eno bugagia ma tonosiąbo dao.

¹¹Te eno abagi, me hai namu dabe, te augwali ena pąba asabo homu isąwai. Augwaligo te eno keni suabo homu isąwai. Tama ena hani sibi dabe augwali te digibulu bidibao.

¹²Te ena ela muainu ebo bidi dabe, augwaligo te ena tola somainu yabo bono gągą sisi elama, muani. Te ena dolainu ebo bidi dabe, augwaligo te enaba dwai sę yabo po miani. Tama sesemane sogo augwaligo enaba dwai sę yabo homu kolesaga ebo dao.

¹³Tiali goli, ena te olo degai bidi tiwai elama, tama eno augwaligo wabo po me odobeo. Ena te pedauwali pania sai tiwai elama, tama eno pedauwali me a me wabeo.

¹⁴Ena te po odisąbo bidi me deli tiwai gilama yali, tama eno augwaliba te po wei me ponobeo.

¹⁵Tiali goli, Genuai Bidi, eno konealubo homu nageba dąų wali. Genuai Bidi, nage eno God da, te naga digi enaba te po wei ponomainu yaibao.

¹⁶Eno te tama gedu haluasa po wali, “Nago te boi bidi dabego ena aiyaba elaluama, tede kęnę omainu me elamuo,” wali. “Te ena dwasianu tula mubo sogo, nago te augwali hagoma eyu, wiegi yai homu pemene emainu me igio,” wali.

¹⁷Magi baso meni, te pąde ena tulaluainu eyu, tama ena sesemane sogo dene ebo dao.

¹⁸Eno dwai sę yali po nageba pusali, tama ena yali sęgęde ena homu dene yai.

¹⁹Te eno boi bidi tigidaligo te bomo mu ebao. Te bidi hauwa umabogo te enaba odolali boi bidi ebao.

²⁰Eno dwagi yai kolesaga augwaliba ebadi, tiali goli augwaligo enaba dwai kolesaga wei ponoyu yai. Eno te wiegi yai kolesaga wali pobadi, tama tede augwaligo homu koneama, tama enade augwa boi bidi pedelali.