Godigo Nogi Ugwaba Sabo Tęąbi Po Wabo Buku Dabe 37:3-34

³Nago konealubo homu Godiba munama, tama wiegi yai kolesaga yao. Nago tama tiali da, tama nage te naga tǫde sesabi elama bidaibao, tama magi nai me deligo nage me dologobeo.

⁴Nago Genuai Bidiba wiegi yai pemene yao, tama agai te nago godolo homu ebo nai dabe mawaibao.

⁵Nago te naga bidibo ula te Genuai Bidi nogoba muao. Te konealubo homu agaba dąų weyu, te agai nage tau saibao.

⁶Tama tiyu, te agai nago wiegi yai kolesaga te hania pepeli diliba pedalumainu ilama, te giliga ula pedalubo tiwai yaibao. Tama agai te nago doloba pai kolesaga te bidi dabego gedude te pepeli diliba haniliyu, te nai tubode te giliga tomo yagasu ula ebo tiwai yaibao.

⁷Nage dua digi te Genuai Bidi pąba pelama, bidao. Te dua digi bidiyu, te agai nage tau sabo tonaluao. Te bidi dabego augwa ebo kolesagade te wiegi yai nai dabe sabode te nago homugo pesa me elamuo. Mu tama, te haniani dwai kolesaga yabo homu ebo bidi dabego ebo homude nago homu kekeli eyu, tama te tiwai sę eyu, pedelabo homu me elamuo.

⁸Nago wado po me wasiąyu, tama nago te haliga sębę ebo kolesaga me tagalao. Nago homu te nai dabede kekeli elama, homugo pesa me elamuo. Te kolesagago nage kekelama, te dwai kolesaga emainu yaibao.

⁹Te dwai sę ebo bidi dabe mu dolaibao. Tiali goli, te konealubo homu dąų olama bidibo we bidi dabego te Genuai Bidigo augwali tau somainu tonaluali we bidi dabe da, te augwali te augwa tǫde bugagia bidaibao.

¹⁰Te pąde tama digi sogo, te dwai sę ebo bidi dabe mu hagawaibao. Te nago augwa pesagede te augwali gegebo sę yaibao, tiali goli nago augwali me sugobeo.

¹¹Tiali goli, te augwa digi augwa aiyaba elalubo we bidi dabe, te augwali te tǫde bugagia bidaibao. Te augwali wiegi yai mu bidiyu, tama wiegi yai pemene elama, bidaibao.

¹²Te dwai sę ebo bidigo te wiegi yai bidi dolabo homu eyu, te wado po wabo dao.

¹³Tiali goli, Genuai Bidigo te sogo me deli te bodolu pedalubo koneyu, tama te sogo te dwai sę ebo bidi dabe dolaibao. Tama tiyu, Genuai Bidigo augwaliba gisugu mabo dao.

¹⁴Te dwai sę ebo bidi dabego te bainat hwą dią siyu, tama te enesigi kegelama, te nai meni yai bidi dabe, me te magi doado bage sǫą pabo bidi dabe enainu yaibao. Augwaligo te doloba pai kolesaga wali pabo we bidi dabe ela muabo homu ebo dao.

¹⁵Tiali goli, te augwa bainatgo te Godigo augwali isilaibao, tama Godigo te augwaligo enesigi togwa paibao.

¹⁶Te doloba pai bidigo te dwasianu naigo te tigidali dwai bidigo nai hauwa te aiyaba elalueibao.

¹⁷Magi baso meni, Genuai Bidigo te dwai bidi dabego bomo silama, tama agai te doloba pai bidi dabe tonalueibao.

¹⁸Genuai Bidigo te aga po wali pabo we bidi bugagia tonalueibao. Tama te Godigo augwali mani doado bage, te augwa sesemane sogo tolalueibao.

¹⁹Te dwai sogode te sęgęgo augwali me gegegobeo. Tama te nasi ebo sogo, te augwa nai hauwa elalu, te augwali nai me sǫą pogobeo.

²⁰Tiali goli, te dwai sę ebo bidi dabe, augwali da, mu dolaibao. Te Genuai Bidigo boi bidi dabe augwali te hagawaibao, te wiegi yai plauago, me nosaigo au tǫba tegaluama, te hagabo tiwai gilama yaibao. Mu tama, te augwali te sia hano te dwasianu sogo naga elaluama, tama te hano pela silibo tiwai gilama ebo dao.

²¹Te dwai sę ebo bidigo te nai dabede negeli selama, tama agai te negeli sali wei me ponogobeo. Tiali goli, doloba pai bidigo te wiegi yai kolesaga eyu, tama agai te gasa bidi dabeba te nai olo mabo dao.

²²Te Genuai Bidigo wiegi yai po augwaliba wabo we bidi da, te augwali te bugagia tǫde bidaibao. Tiali goli, te Genuai Bidigo te dolomainao po wali we bidi dabe da, teda agai augwali sela sąwaibao.

²³Genuai Bidigo te we bidi bilibo dodolobo sę ebo dao. Te agai bidi me deligo kolesaga wei eyu, godolo ebaso da, agai te aga dolasa bilimainu dąų walaibao.

²⁴Tama te bidi tulalubaso, tagalao, aga te mu dologobeo. Magi baso meni, Genuai Bidigo te aga nogo tola selama, tama aga ma dolugulumainu ebo dao.

²⁵Polobadu ena gesi ogwa bidi bidali, tama megi da ena monu dabe yalio, tiali goli te Godigo doloba pai bidi me deli tudiba mubo te eno me subeo. Tama te doloba pai bidi dabego wai dabe te nai sǫą pabo te eno me susiąyu, tama te gasa bidigo augwali tau somainu i me wabeo. Mu menio.

²⁶Te sesemane sogo te doloba pai kolesaga ebo bidigo te olo mu tau sabo wiegi yai kolesaga eyu, tama te gasa we bidi dabeba nai hauwa mayu ebo dao, tama augwa wai dabego te aya ida wiegi yai homu pemene ilibo sę ebo dao.

²⁷Nago te tigidali dwai kolesaga tudiba munama, tama wiegi yai kolesaga naga yao. Te tiwai nago ebaso da, teda nago nosali pedalubo hani bage augwaligo te tǫde sesabi elama, bugagia bidada paibao.

²⁸Magi baso meni, Godigo te doloba pai kolesaga ebo we bidi wei eyu, godolo mu ebo dao. Agai te aga we bidi hagamainu me egobeo. Sesemane sogo Genuai Bidigo te we bidi dabe dolasa bilimainu tonalueibao. Tiali goli, te dwai bidi dabego wai dabe da, te mu dolaibao.

²⁹Tiali goli, te doloba pai bidi dabe da, te Godigo augwa mani tǫ saibao, tama augwa tede sesemane sogo bidada paibao.

³⁰Doloba pai bidigo te wiegi yai kolesaga koneani elalu, tama wiegi yai po naga pusaibao. Agai te doloba pai kolesagade po mibo dao.

³¹Te Godigo bomai po aga homude elalu, tama agai God wali peyu, tama te bomai po me tagalogobeo.

³²Te dwai sę ebo bidi geme dualalu, tama te doloba pai bidi tonalueibao, tama aga ela muabo sunumi gegeyu tebo dao.

³³Tiali goli, Genuai Bidigo te doloba pai bidi te dwai bidigo ela mumainu me tagalogobeo. Mu menio. Tama te dwai sę ebo bidigo te doloba pai bidi po tų ilibaso da, teda Genuai Bidigo agai te doloba pai bidi te po tųde aiyaba elalumainu me sula tagalu me gogologobeo.

³⁴Nago konealubo homu Genuai Bidiba dąų olama, tama agai po dolo wali peyu, tama agai kolesaga wali pao. Nago te tiwai eyu da, teda agai nageba te genuai nogi mayu, tama nago te agai nageba mani tǫ tolalu bidaibao. Tama agai te dwai sę ebo bidi dabe dolobo te nago sueibao.