Godigo Nogi Ugwaba Sabo Tęąbi Po Wabo Buku Dabe 35:8-28

⁸Tiali goli, te augwaligo konesiąwai sogo, te augwaligo ena dolomainu te muani bono gągągo, nago te augwa digi polo dolomainu ilao. Tama augwa digi augwa te nigali dedageba tolalumainu yao.

⁹Genuai Bidigo te tama tibaso, tama te eno wiegi yai homu pemene agaba yaibao. Te agai ena tau sobaso, te eno bugai homu agaba yaibao.

¹⁰Tama te eno usu da po mu te Godiba waibao, “Genuai Bidi, te nage tiwai me deli elalubeo. Nago te bomo meni yai bidi dabe bugagia tau sabo dao, tama te bomo mu ebo bidi dabego augwali dolainu ebo te usu me egobeo.”

¹¹Te tibo po wabo bidi dabego enaba te eno isiąwani dwai sę meba po enaba kisilama wali.

¹²Eno wiegi yai kolesaga augwaliba ebadi, tama augwaligo dwai kolesaga enaba wei ponani. Tama tibaso, eno haliga sęgę mu yai.

¹³Tiali goli, eno augwaliba te tiwai sę me ebeo. Mu menio. Te augwali gasi elalubaso, eno homu dene mu elama, tama eno ugwa dwai gudali. Eno te nai tubo me habu selali, tama tego digi enaba sęgę mani. Tama eno usu da weyu, gedu haluasa po te nago augwali tau somainu wali.

¹⁴Te eno abagi me ama teba homu sęgę ebo tiwai yali. Ena te ida isaide te homu dene eyu, gela wabo bidi tiwai bilali. Ena te haliga sęgę mu elama, tama ena te gela weyu, homu dene dali bidali.

¹⁵Tiali goli, te sęgęgo ena gegebo sogo, augwali sisinama, te wiegi yai homu pemene yai. Augwali sisinama, ena elaluainu yali. Te eno konesiąwani bidi meba, augwaligo enaba te dwai po kisilibo sę te toma me nabeo.

¹⁶Augwaligo posobo po umabo mu weyu, tama enaba sęgę mani. Augwaligo ena wei me isiąma, tama augwaligo enade gebo hulia sali.

¹⁷Genuai Bidi, te nisu naga sogo nago augwali sula tagalogowe? Nago ena ma siyu, tama augwaligo ena me dologobeo. Augwaligo te laiongo ena ela muainu ebo tiwai ebao, tama ena nago te augwali nogode ma sao.

¹⁸Te nago tama tibaso da, te eno nageba usu da wabo po te hauwa we bidi sisinibo tomode te po waibao. Mu tama, te eno nago nogi te genuai hani we bidi tomode ugwaba saibao.

¹⁹Te bidi mebago ena dali odolali boi bidi ebao. Tiyu, augwaligo ena aiyaba elalu, te kęnę wabo te nago sula me tagaligio. Augwaligo odolali ena dali dwai homu ebao, tama tiyu, nago eno sęgęde te wiegi yai pemene emainu sula me tagaligio.

²⁰Augwaligo te gasa bidi dabe dali bugagia bidabo po dwasianu me migobeo. Augwaligo te bidibo bulude bugagia bidibo bidi dabe dolabo po weyu ebo dao. Augwa te wiegi yai bidi dabe tibo po ola mayu, dolabo po sisinama mibo dao.

²¹Augwaligo enaba po kisilama, te genuai po dągą weyu, te tama po wabo dao, “Mu tama, dago te nago dwai kolesaga meba te ebo gedugo sualio,” te po wabo dao.

²²Tiali goli, Genuai Bidi, nago te bidi dabe augwali sualio. Tama tiyu, nago pedauwali panialuamuo. Genuai Bidi, nage enade te digibulu me bidilamu dao.

²³Nage God, me eno Genuai Bidi, nage hogodama, te ena tau sagasao. Nago ena hasegelama, tama ena tau sabo po hanilama pusao.

²⁴Genuai Bidi, eno God, nago te doloba pai kolesaga ebo dao. Nago ena tau sabo te boi bidi dabego koneama, eno te doloba pai kolesaga wali pabo da po omainao. Te ena dolomainu eyu, augwaligo te kęnę wabo te nago sula me tagaligio.

²⁵Nago te augwade digi augwa po mia siyu, te tama po wali, “Wiegi yai mu da,” te po wabo nago sula me tagaligio. “Te dago yainu yali sę, megi da te sę yalio.” Nago te po augwaligo omainu me igio, “Dago aga dolali dao.”

²⁶Augwaligo te enaba pedelali sęgęde wiegi yai homu pemene yali. Tama tiyu, nago augwali dwai hale emainu elama, tama augwaligo homu kone mu tuą pomainao. Augwa digi augwa nogi ugwaba siyu, te ena aiyaba elaluainu yali, tama tiyu, nago augwali te hale dwai mu emainu elama, tama augwaligo nogi te aiyaba elaluao.

²⁷Tiali goli, te gasa bidi dabego homugo nago ena te doloba pai bidi nogi emainu homu eyu, augwa wiegi yai pemene elama i weyu, tama bugai haliga elama bidimainu emainao. Sesemane sogo augwa te po omainao, “Genuai Bidi te polalubo bidi mu da,” waibao, “agai te aga sę bidi bugagia bidimainu godolo ebo dao,” omainao.

²⁸Tama tiyu, te eno nago doloba pai kolesagade po hanilama weyu, tama nago nogi tigidali sogo giligade me, hulide me ugwaba saibao.