Godigo Nogi Ugwaba Sabo Tęąbi Po Wabo Buku Dabe 22:1-31

¹Te Devitgo asęani balia po me deli dao. Eno God, eno God, magi baso nago ena tagaluwe? Magi baso nago ena tau sisąma ebawe? Magi baso eno gela wabo nago odobewe?

²God, eno nageba te giligade i wabo da, tiali goli nago eno po odobeo. Eno nageba te hulide me i wali, tiali goli nago te po wei ponesiąbaso, eno dwasianu toma me nabeo.

³Tiali goli, naga digi nage te tedali wiegi yai mu elalubao. Nage te king bidibaso, tama te Israel dabego nago nogi ugwaba sabo dao.

⁴Polobadu dago wąį nǫų dabe augwaligo konealubo homu nageba dąų wali. Augwa konealubo homu dąų obaso, tama nago augwali tau selama, tama te boi bidi dabego augwali aiyaba me elalubeo.

⁵Augwaligo nageba i weyu, gedu haluasa po obaso, tama nago augwali te boi bidi dabego nogode ma dobola sai. Awe, augwaligo konealubo homu nageba dąų wali, tama augwa te konealubo homu dąų wali te odolali me hagagobeo.

⁶Tiali goli, bidigo gedude ena te tǫde osogani tiwai, ena te olo bage tiwai mu da. Tigidali bidigo enaba wado po weyu, tama ena tudiba muani.

⁷Tigidali we bidigo ena sulama, tama augwaligo posobo po enaba wabo dao. Augwaligo hamena enaba diniyu, tama augwa tobolu peme eyu ebo dao.

⁸Augwaligo te po weyu, “Nago konealubo homu te Godiba mubo da,” wabo. “Magi baso agai nage ma sabewe? Te Godigo nage wei homu eyu da, te magi baso agai nage tau sabewe?” Augwaligo te tobage po wabo dao.

⁹Tiali goli, God, nago naga ena te idago haligade selama, tama ena bugagia pedelali. Tama ena te ame tubadi, nago ena tonaluai.

¹⁰Eno konealubo homu nageba muani, te idago ena ame nani sogode dąį elasa, megi e sogoba su nagasobao. Idago ena gesi noma ame nabode, tama nage eno God bidai.

¹¹Te sęgę enaba megi pedalubao, tama tiyu, nago ena me tagaligio. Ena tau sabo bidi deli me menio.

¹²Te boi bidi hauwago ena te bulmakau dabe pobeasa bilibo tiwai ebao. Augwali te Basan bulude omai bulmakau dabego bomo tiwai gilama ebo dao.

¹³Te boi bidi dabe augwaligo te ena dolainu sisi elama, te laiongo dwai hwą wabo tiwai eyu, tama te uni hasa tuabo pedauwali nalubao.

¹⁴Eno bomo tigidali silalio, augwa te tǫba wę gelama, te soa sabo tiwai gilama yai. Te dili ununani tigidali te guda pai. Eno homu te mu nagamea pali, te posolo yai ili wę pedalubo tiwai yali.

¹⁵Eno dogoni te wa mu pali, tama eno hamena te pedauwalide agana sai. Naga digi ena tagalama, ama ena mu isainu ebao.

¹⁶Te dwai bidi dabego ena te tigidali habu badu te yowigo uni hasa pobeasa bilibo tiwai gilama ebao. Augwaligo eno sągąde me nogode te augwaligo gąųgo kelebao.

¹⁷Eno tigi dili tigidali te hania pedelali. Tama te bidi dabego ena sulama, tama ena dolali sęde te augwa wiegi yai homu pemene yai.

¹⁸Augwaligo te eno ugwa dabe selama, augwa dobola sali, tama mena bidigo te eno ugwa dabe deli deli sabo bidi pedalumainogo eyu, augwaligo te satu gagali yai.

¹⁹Genuai Bidi, nage enade digibulu me bidamuo. Nage da, te ena sesemane sogo tau sabo bidi dao. Nage polo tama asiyu, ena tau sagasao.

²⁰Nago ena ma dobola sali da, teda augwaligo ena te moni hwągo me ela mugobeo. Nago ena tau sobaso da, teda te yowi tiwai bidi dabe augwaligo ena ela muainu ebaso, te usu me egobeo. Menio. Te ena bidibo ula elalu, bidaibao.

²¹Augwaligo ena te laiongo uni hasa ela tubo tiwai gilama silainu ebao. Nago ena te augwaligo nogode ma dobola sao. Eno magi sę me deli ebo te uni bulmakau dabe gesabidide me usugobeo.

²²Nago tama tiwai ebaso da, teda eno te ena hani bidi dabebolo nago yali sę po pusaibao. Augwali te lotu weyu, deliba sisinibo side, tama eno nago nogi te augwali tomode ugwaba saibao.

²³Eno tama po waibao, “Dage te Godigo hani da,” po waiba, “aga nogi ugwaba sao. Dage Jekopgo hani, te Genuai Bidigo nogi ugwaba sao. Awe, dage te Israel dabego hani, dagego agaba lotu wabo po wao.

²⁴Agai te magi doado bage meni yai bidi dabe tudiba me mubeo. Agai te augwalide sęgę me dene ebo te olo nai da homu me egobeo. Tama aga te augwalide digibulu me bidigobeo. Menio. Agai te augwaligo usu da weyu, gedu haluasa po wabo odobo dao.” Eno tama po waibao.

²⁵Te lotu wainu sisinibo genuai pesagede te eno nago nogi deli naga ugwaba saibao, te nago ebo sę tigidalide te tama tiaibao. Te polobadu eno yaibao po dąų wali ofa, te eno te nagede wi ebo we bidi gedude yaibao wali.

²⁶Te magi nai doado bage meni yai bidi augwali eno i obaso, augwali aselama, te nai tulama, haliga mu pągąna paibao. Tama te Godiba pabo bidi dabego, teda augwaligo aga nogi ugwaba saibao. Eno homugo Godigo augwali sesemane sogo bugagia wiegi yai ilama, bidimainu yao.

²⁷Te tǫde tigidali we bidigo augwaligo te Godiba homu koneama, tama augwa agaba ma asaibao. Te tigidali hani we bidi dabe augwaligo kidu sugunama, agaba lotu waibao.

²⁸Magi baso meni, Genuai Bidi te king bidiyu, tama agai te tigidali hani we bidi tonalubo dao.

²⁹Te dwai kolesaga eyu, hagoma ebo bidi dabego kidu sugunama, tama agaba lotu waibao. Te bidabo ula elalubo usu isiąyu, te isabo ąǫ ebo bidi dabego, te tigidaligo kidu sugunama, te Godiba lotu waibao.

³⁰Te nosali pedalubo we bidi hani, augwaligo te agai sę yaibao. Te bidi dabego te nosali pedalubo haniba te Godide po hania pusaibao.

³¹Te hani augwali ame nisiąbadi, tiali goli augwali pedalubo si da, teda augwaligo te tama po augwaliba waibao, “God aga digi te aga we bidi dabe ma sai dao,” te po waibao.