Godigo Nogi Ugwaba Sabo Tęąbi Po Wabo Buku Dabe 18:4-29

⁴Te pąde ena isainu yai, tama te bonogo ena bomonama kęnani tiwai yali. Te dwai sę ebo bidi dabego enaba bomonama hwįani, tama augwali te genuai tamu ąį sigo ena mesegelibo tiwai yali.

⁵Te pąde ena isainu yali, te bonogo ena bomonama kęnani tiwai yali. Te gų pagego ena dalainu tonaluai.

⁶Ena haliga sęgę dwai ebaso, tama eno Godiba i wai. Eno gedu haluasa po te ena Godiba weyu, te agai ena tau somainu yai. Aga te aga wiegi yai be mude bidiyu, tama eno po odali. Te eno gedu haluasa po wabo te agai oloba pedelali.

⁷Tialima, megi da, Genuai Bidigo wado po elalubao. Tama agai te tǫ mali mu ilali. Tama te bulu du page dabe te mumunu ela silali.

⁸Te hano aga gunide pedelali. Tama aga pedauwalide dabo siago te doado bage hauwa ulali.

⁹Agai te pǫ dabe sela sąnama, tama aga aiyaba dulali. Tama husugu yai pǫ te aga sągą dologode elaluali.

¹⁰Aga te ensel dabe daide ugwadu dugulasa, tama bola asai. Te bogo te ba dabego bogo tiwai elalubao, tama te God auwąsa polo mu asaibao.

¹¹Aga digi aga te hulia sigo haluali. Aga te tulubage umabo mu elalubo husugu yai pǫ tomoba duala sai.

¹²Te pǫde be sele eyu, tama te bogoli mu elama, te agaba kisa sigi pali. Tama sia me talua ge tulubagego te husugu pǫ aluama, tama aiyaba dulai dao.

¹³Tama Genuai Bidigo te dagalude bomonama mu i weyu, te pǫ kulukulu wabo tiwai yali. Tama te bidi dabego te Ugwade Mu Bidibo Godigo i wabo odali.

¹⁴Agai te be selego te bidi dabeba ula enani, te bidigo te boi bidi dabe te enego enebo tiwai ebaso.

¹⁵Genuai Bidi, nago te dwai sę ebo bidi dabeba wado ebo sogo, te bomai waligo augwali degelibo tiwai ebao. Tama te tamu ąį dologode tigidali tǫ te bulu ulaba hania pedelali, tama te tǫ page me te hania pedelalio.

¹⁶Genuai Bidi te dagalude bidiyu, tama agai nogo te aiyaba muyu, tama ena tola sali. Ena te aiyanu mu yai węde te hagawainu ebo bidi tiwai ebadi, tama Godigo ena ma salio.

¹⁷Agai ena te boi bidi dabego bomai nogode me, te ena wei isiąbo bidi dabego nogode ma salio. Te bidi dabe augwaligo bomogo te eno bomo aiyaba elaluai dao.

¹⁸Polobadu, te dwai sęgo ena gegelama, tama augwaligo enaba hwįagasali. Tiali goli tagala, te Godigo ena tonaluali.

¹⁹Agai ena tonalubaso, tama eno te boi bidi dabe tagalali. Agai ena wei mu elama, tama agai ena ma sai dao.

²⁰Eno te doloba pai kolesaga wali pobaso, tama Godigo wiegi yai sę enaba bugagia yai. Eno dwai me deli ebeo, tama tiyu, Godigo wiegi yai sę enaba mawai dao.

²¹Magi baso meni, eno te Genuai Bidigo bomai po bugagia wali pai. Eno dwai sę me isiąma, tama ena God tudiba me mubeo.

²²Eno te agai doloba pai bomai po te sesemane homu kone paliyu, tama eno agai po tudiba me mabeo.

²³Te magi dwai sę me deli isiąbo te agai koneani, tama eno te magi nai me delide magi sę me ebeo.

²⁴Tama tiyu, Godigo te eno doloba pai kolesagade homu koneama, tama agai ena bugagia mu tonaluai. Magi baso meni, agai koneani, te eno magi sę me isiąwai.

²⁵Te bidigo nage wali mu asobaso da, teda nago te nago po dolo wali pelama, tama nago aga tonalubo dao. Te bidi dolasa biliyu, tama te magi naide te magi me deli isiąbaso, nago agade te wiegi yai homu ebo dao.

²⁶Te bidi me deligo te meda mu meni yai kolesaga ebaso da, teda nago me agaba te wiegi yai kolesaga ola mabo da. Tiali goli, te bidigo dwai kolesaga wali pobaso da, teda nago agaba te dwai kolesaga wei ponobo dao.

²⁷Nago te augwa digi te haliga aiyaba elalubo we bidi dabe augwali te ma sabo da. Tiali goli, nago te augwa digi augwa nogi ugwaba sabo we bidi te aiyaba elaluaibao.

²⁸Te enade digi te Genuai Bidigo ula elalubao. Awe, tama ena Godigo te enade hulia sai elalubo te sela sąbo dao.

²⁹Godigo te boi bidi dabe dali hwįbo bomo te enaba mawai. Tama agai enabolo te augwaligo seselalubo nai dabe dolobo te genuai bomo mawai dao.