Godigo Nogi Ugwaba Sabo Tęąbi Po Wabo Buku Dabe 145:5-20

⁵Te bidi dabe augwaligo nago bomo elalubo po weyu, tama nage genuai tuni bidi mu da waibao. Tama eno digi te eno nago dwagi dwagi yai sę ebo da homu ebo dao.

⁶Tama te we bidi augwaligo nago bomo yai sę ebo po weyu, te bidigo isiąbo sę naga dao, tama eno nago genuai sę yali po pusaibao.

⁷Te augwaligo nago wiegi yai kolesaga hauwa ebo po pusuyu, tama nago olo mu tau sabo kolesaga po olama, wiegi yai homu pemene eyu, balia po waibao.

⁸Genuai Bidigo da godolo mu eyu, homu dene eyu, tama da olo tau sabo sę ebo dao. Agai wado po polo wasiąma, tama sesemane sogo agai da wei mu ebo dao.

⁹Agai wiegi yai sę tigidali we bidi dali eyu, tama agai nigali nai tigidali homu dene eyu, dolo mu tau selama, mabo dao.

¹⁰Genuai Bidi, nago nigali nai tigidaligo nago nogi ugwaba saibao. Tama nago we bidi augwaligo nagebolo usu da po waibao.

¹¹Te augwaligo nago genuai nogi te nago tonalubo bulu tigidalide elalubo po weyu, tama nago genuai bomo elalubo po waibao.

¹²Tama tibaso, tigidali we bidi augwaligo nago genuai sę ebo konemainogo yaibao. Tama nage bomo yai tuni bidi bidibo te augwaligo konemainogo, tama nago nogi genuai mu dao.

¹³Tama nage te tuni bidi bidiyu, tama tigidali we bidi sesemane sogo nago tonaluyu, bidada peyu, bidada paibao. Genuai Bidi Godigo agai aga we bidi dali dąų wali po wali naga pabo dao. Te agai me deli tagalobo menio. Agai wiegi yai sę naga eyu, da tau siyu ebo dao.

¹⁴Agai te tigidali sęgę elalubo we bidi, me te gasa bidi dabego aiyaba elalubo we bidi, augwali tigidali agai ugwaba siyu, tau sabo dao.

¹⁵Tama te bidibo ula elalubo nai tigidaligo agaba tonono ebo dao, tama agai augwali nasi ebo sogo nai mabo dao.

¹⁶Awe, agai augwali usu elama, bugagia bidimainogo tigidali nai mabo dao.

¹⁷Godigo doloba pai kolesaga naga wali peyu, tama agai da olo mu tau sabo kolesaga mayu, te agai tigidali ebo sęde tebo dao.

¹⁸Tigidali we bidigo homu agaba mu munama, i weyu da, teda aga augwali pąde bidibo dao.

¹⁹Te agade wi ebo we bidi, te augwali nai meni baso, teda agai augwali nai mabo dao. Tama agai augwali gela wabo odolama, te augwali ma sabo dao.

²⁰Agai te aga godolo mu ebo we bidi bugagia tonalubao. Tiali goli, te dwai kolesaga ebo we bidi, augwali dolaibao.