Godigo Nogi Ugwaba Sabo Tęąbi Po Wabo Buku Dabe 135:5-17

⁵Eno koneani, Genuai Bidigo nogi te genuai mu elalubao, tama aga te tibo god tigidali daide ugwadu aga bidibao.

⁶Genuai Bidigo mena sę te dagalude me, te tǫde me, te tamu węde me, te tamu wę pagede yabo homu ebaso da, teda agai te sę ebo dao.

⁷Agai te tulubage tulubo pǫ te tigidali tǫ badu pedalumainu elama, tama be sele te tulubage dali pedalumainu ebo dao, tama te wali hodolama, te tedela palobo dao.

⁸Te Isip tǫ pedai kantride agai te Isip dabego gomunai ogwa dabe ela mubadi, te augwa kibu bulmakau omai dabe me ela silali.

⁹Tama te Isipde agai te bidigo me isiąwai bomai sę dabe te kingba me, aga ofisa dabeba dali, te dene mawai dao.

¹⁰Genuai Bidigo te bulu tǫ pedai hauwa dolama, tama te bomai king meba ela muai dao.

¹¹Agai te Sihon elali, te Amor dabego king, tama Ok, te Basan bulu king da, tama te Kenan tǫ king tigidali ela silai dao.

¹²Tama agai te king dabego tǫ te aga hani bageba mani, te Israel dabebolo mawai dao.

¹³Genuai Bidi, sesemane sogo te we bidi dabego te nage koneama, te naga digi nage te God da homu yaibao. Tama te nosali pedalubo hani dabe, augwaligo me te nage homu konealuaibao.

¹⁴Tama Genuai Bidigo te seselalubo kolesaga te aga we bidi dabeba eyu, tama aga te sę bidi dabeba homu dene yaibao.

¹⁵Te gasa hani dabe augwaligo te augwa tibo god dabe te silva me golgo nigali. Te bidi dabe augwa nogogo digi te tibo god dabe nigai.

¹⁶Te tibo god dabe augwa pedauwali elalubao, tiali goli augwa po wabo usu meni yai. Tama augwa gedu elalubao, tiali goli augwa nai dabe me subeo.

¹⁷Tama augwa olo elalubao, tiali goli augwa po wabo me odosiąwai, tama augwa mobo sabo usu meni yai.