God-waŋarrwuŋ djämapuy mala 17:1-2

¹Yo, marrtjinany maṉḏa gan ŋunhi Bolnydja* ga Djälatjtja* wäŋakurrnydja Yambipulakurra* ga Buluniyakurra,* ŋuliwitjarryin maṉḏa ŋunhi djuḻkthurrnydja, ga yan bili ga bunan maṉḏa ŋunhala wäŋaŋur yäkuŋur Dhatjalunikan. Ŋunhiliyin gan ŋunhi Djuw-malawnydja buku-ḻuŋ'thunamirrnydja buṉbu dhärran, ŋunhi walal ŋuli ganha buku-ŋal'yuna God-Waŋarrwu.

²Bala maṉḏa Bolnydja ga Djälatjtja dhunupan marrtjinan yan ŋunhiwiliyin buṉbulil, bili bitjarr bili muka maṉḏa gan ŋunhi ŋäthilnydja marrtjin ga dhäwuny' lakaraŋal ŋurikiwurruŋuny ŋunhi Djuw malawnydja yolŋuw walalaŋ buṉbuŋur malaŋuŋur muka yan buku-ḻuŋ'maranhamirriŋur. Ga dhunupan yan ŋayiny ŋunhi Bolyuny lakaraŋala gan marŋgikuŋala walalany ŋuriŋi bili yan waŋganydhu ganydjarrmirriynha dhärukthuny. Ga ḻurrkun'thuny Gänaŋ'maranhamirriynydja waluy ŋunhiny ŋayi gan lakaraŋala marŋgikuŋala dhawaṯmaraŋala yuwalkkuŋala yan beŋura ŋunhi God-Waŋarrwala djorra'ŋurnydja, märr walal gan ŋunhi dharaŋara ŋunhiyiny dhäruk, ŋunhi walal gan be ŋäthil djawarrkmirriy walal lakaraŋal ŋunhiyi Maŋutji-dhunupayanhawuynhan yolŋuny, ŋunhi God-Waŋarrwuŋ, ŋunhi nhakun ŋayi dhu dhiŋgam, ga bulu ŋayi dhu walŋathirryi dhiŋganhaŋur. Yo, lakaraŋalnydja ŋayi gan ŋunhi Bolyuny bitjarr, “Dhuwandja ga ŋarrany nhumalaŋgal lakaram ŋanyanhan Djesunhan, ŋayin ŋunhi Maŋutji-dhunupayanhawuynydja yolŋu God-Waŋarrwuŋuny djuy'yunawuy.” Bitjarrnha ŋayi gan ŋunhi dhäwuny' lakaraŋal Bolyuny.