Giugiukamaḡedi 2:13-29

¹³Bi lava ḡesaudi ai gadolosedi bi a giuna gado, “Niga lavedi waen a tego gulate te a bu'uwa bi sa giugiu yabayababa.”

¹⁴Ḡome Pita bi giugiukamaḡedi 11 vaitedi a moito bi Pita kalinana dididiginemo lava i giuwedina gado, “Temi Diu bi ma baibaimiḡa Yelusalemmo ko miyamiyana, koi beyavaiya kauwa bi bai yà giuwemi!

¹⁵Niga lavedi mote a tego bu'uwa mai temi ko noḡonoḡotina banina niganana ba 9-na okoloki olaolala.

¹⁶Niga ba buka wadubonemo taugiuwatana Diyouwelo bai i giugiuwena niganana ya tubutubuḡa. Diyouwelo niga mainana i giu,

¹⁷‘Ḡome Maimaituwa i giuna gado: Laḡan damodimo tagu kaka egu Aluwa yà ḡini kamaḡe lava matabudi lisidimo. Bi natunatumi oloolotodi bi waiwaivinidi tedi kaka taugiuwatana sa tubuḡa bi giugu sa lauguguyae. Bi emi olooloto valivaliudi kaka wailove sa kitedi. Bi emi magumagula lauboni sa kitedi.

¹⁸Mba laḡandimo egu taupaula oloolotodi bi waiwaivinidi matabudi lisidimo egu Aluwa yà ḡini kamaḡe, te tedi taugiuwatana sa tubuḡa bi giugu sa lauguguyae.

¹⁹Bi tagu mataila galewemo yà voiyedi bi dobumo kwasina bi kaisikei baduwalina.

²⁰Suwala yai dudubala bi nawalai ya sabana maibena kwasina bi muliḡa kaka Bada ena laḡan dididiga ya tava.

²¹Tedi mabai Bada isanemo sai baḡana ba matabudi sa yawasana.’

²²“Islael lavemi, niga giudi ko vaiyedi: Maimaituwa Nasalet Yesuna, ḡailisi i vite te kauwa nananakidi bi mataila i voivoiyedi, mba Maimaituwa i wai lovemi te temi Yesu ko sibe.

²³Bi wala Maimaituwa ena ogatala i voivoiyena luvanemo, temi gebogebo lavedi nimedimo kona sako te kolosimo kona tupalatu te i peki.

²⁴Bi Maimaituwa Yesu lisinemo peki tuniyavina bi nuwaboya i kaikamaḡe bi i ka kenamoito munaḡe. Banina peki mote ḡemoḡemotina te maso Yesu i kaididi.

²⁵Banina Deivida Yesu niga mainana i gei giuwata, ‘Bada Maimaituwa e kita laḡan matabuna ya waidoligu. Tana tagu vaitegu aubaina te egu ḡaviya mote yàma nailedi.

²⁶Taunana aubaina tagu yài nuwavisu bi mayasisigu yà sale. Bi avena te yà peki, bi yà noḡonoḡoti te tam tubuḡigu kwa labe kauwe.

²⁷Bi Maimaituwa, tam mote pekipekidi edi gabumo kuma gosegu, bi kota em taupaula waiyawa tubuḡina mote kuma kita kamaḡe ima bova.

²⁸Tam yawasana kunai lovegu te yà miya nonoḡa. Tam vaitegu aubaina te nopogu yasisi i wanavu.’

²⁹“Egu lava, eda magula ḡalibona Deivida ena giu kamaina te yà giu otiḡemi. Deivida i peki te a dobo bi kokowagina niganana niga ḡome ya kenakena.