Text copied!
CopyCompare
Si Biblia - Ginwa-ginwa' - Ginwa-ginwa' 2

Ginwa-ginwa' 2:8-39

Help us?
Click on verse(s) to share them!
8Ket pa'no bale' a mangkarnge-karnge' tamoynan man'irgwen ra a irgo tamon diri?
9Si'tamo nin iti ket main nin taga sa Partia, sa Media, sa Elam, sa Mesopotamia, sa Judea, sa Capadocia, sa Ponto, sa Asia,
10sa Frigia, sa Pamfilia, sa Egipto. Main et nin taga sa lulugar sa nasyon nin Libya nin adani sa Cirene. Main anamaet et nin taga Roma nin Judio tan saray nasagyat sa pammemper nin Judio
11tan main et nin tutawo sa Creta tan sa Arabia. Ket mangkarnge' tamon mampag'irgo sara sa uirgo tamon diri maipa'ka' sa makapaka'ngap nin ginwa-ginwa' nan Dios.”
12Kai ma'pos nin isipen nin barang saya a mampangyadi' ket kai nin mabulsu-bulsot a pittepetan ran wanra, “Ani kadi' a pipa'kaan nin sayti?”
13Main sara bale' a manuya'-tuya' nin wanra, “Nabok sarain tamo'!”
14Ket, nako ya sa adapan si Pedro nin kalamo' nasaray labinsaya et nin apostoles, mi'sa ya nag'irgo nin maksaw a wana, “Kababalyan tan sarba moyo nin mampiikap iti sa Jerusalem, rumnge' kamo pan maong tan andi' kamo nin malingo maipa'ka' sa mampangyadi'.
15Kai sara nin nabok ti nin tutawo nin bilang sa man'ipa'ka' moyo. Alas nwibi tamo' et nin buklas!
16No kai edet, saytin mampangyadi' ket say nipadles na ni Prupita Joel sin nu'nan panaon a wana:
17‘Wana nin Dios, “Sa panaon nin adapen ana nin kala'pusan, ibi koya nin sibubulos a Ispirito ko sa sarba. Ket saray ua'nak moyo, lulalaki man o bubbayi, mangipatanda' sara li' nin maipa'ka' kongko. Saray mangalalago' nin lulalaki, pa'kitan kosara li' nin bubagay a kai ra ma'kit nin raruman tutawo, tan saray mumasiken, manaynep sara li' nin say ipataynep ko konra.
18O', mataman konran uaripen ko, lulalaki man o bubbayi, ibi koya anamaet nin sibubulos a Ispirito ko sa saytaw li' nin panaon, ket mangipatanda' sara nin maipa'ka' kongko.
19Mangipa'kit ako nin makapaka'ngap nin mangya-mangyadi' sa langit, tan mumilagro nin paka'kitan iti sa luta'. Ma'kit li' sa luta' a daya', apoy tan makubpal nin asok
20tan sa langit, dumedlem ya li' a awro tan umudit ya li' nin bilang daya' a bulan. Ket konan siin, rinmate' anaytaw si impurtantin panaon a si'kon si Dios ket mag'uray akon main nin pinasyan kaalakyan nin pakayadi'.
21Ket maisalba koyay si'numan a kidawat nin inganga'do kongkon si Uunuren.” ’
22Kanya' nin reng'en rako pa, si'kamon kapada ko nin Israelita,” wana ni Pedro. “Si Jesus a taga Nazaret, yupa' kona, nangwa' ya a Dios nin mumilagro tan makapaka'ngap a nangya-nangyadi'. Tanda' moyoynay maipa'ka' sa sayti say man'ibarita' ko ta iti nin mismo nin nangyadi' sa lugar moyo. Nipatanda' na nin Dios komoyo a si Jesus tawo naya nin nibaki' na.
23Ket siti si Jesus, nipagamet ya komoyo bana' ta nidisisyon tan niplano nayna in nin gindat nin Dios. Ket nipapati moya konran ambo' nin Judio a nipasak raya sa kudos.
24Bale' pinasubli' nayan mabyay nin Dios ket ginlat naya sa irab nin pag'in nin nati ta kai nin magwa' a mag'uray a patiti kona.
25O' ta nisurat nayti e ni David sin nu'nan panaon a maipa'ka' konan siti si Jesus, ‘Tanda' ko nin kalamo' koyan pirmi a Dios. Iti yan pirmi sa abay ko kanya' nin kasa gapo nin makatege' kongko.
26O' a wanin kanya' nin maririket a kanakman ko, tan mariga ako sa pag'iirgo ko; ket, mataman no tawo ako tamo', matalek ako nin liso a
27kai mo nin pauryan, O Dios, nin itaw ya tanay kararwa ko sa Hades, tan kai mo nin iyaburoy a maumok yay lalaman nan ibabaki' mon tutuo komo.
28Nipatandaan ma kongko a dalan nin mangipunta kongko sa byay. Gaw'en mon malipos ako nin ririket ta kalamo' katan pirmi.’ ”
29Nituloy na ni Pedro maipa'ka' konan siin ket wana, “Bubsat, tanda' tamo anaod a si puon tamon si David, nati ya ket nitabon raya, tan say katutu'wan ket ke'ran na et nin pantyon na anggan sawanin.
30Si David, tanda' naytaw say nipangako' nan Dios kona ta nisamba nan Dios kona a ipata'gay naya li' a saya konran puri na nin mag'adi' ya nin bilang sa nipag'adi' na ni David. Bana' konan siin tan bana' anamaet a saya yan prupita, kanya' nin
31tanda' naynan gindat a gaw'en na nin Dios. Ket nibarita' nayna anaod nin gindat a maipa'ka' sa isusubli' nan mabyay nin Cristo nin nipangako' nan Dios, a wana kai naya nin pinauryan nin Dios nin itaw ya tanay kararwa na sa Hades, tan a si lalaman na, kai na nin niyaburoy a maumok ya.”
32Wana ni Pedro, “Ket matistigusan min sarba a si Jesus nin pinasubli' nan mabyay nin Dios a man'ibarita' na sa sain a wana.
33Nikwa yayna sa sangkata'gayan nin lugar sa wanan nan Dios a syay Ama na, tan nibi nayan Ama kona a Ispiriton nipangako' na kona. Kanya' nin naimatunan tan narnge' moyo sawanin a makapaka'ngap nin nunangyadi' a pinangibwat na ni Jesus nin nangyadi' sa pakayadi' nan Ispirito nan Dios.
34O' ta main et nin nipadles na ni David, bale' ambo' anaod nin say lalaman nan diri a mantukuyen na bana' ta kai ya nin nuli' itaw sa kami'nan nan Dios. Nisurat na a wana, ‘Wana nin Dios konan Uunuren ko, “Tumekre' kadti sa pawanan ko
35mintras a mampasukuen kosaran liso komo a kukalaban mo.” ’
36Bana' ta wanin,” wana ni Pedro, “matkap a sarba tamon Israelita ket, matandaan tamon maong a sitaw si nipangako' nan Dios ket ginwa' nayan Uunuren tan Cristo. Sya si Jesus nin nipasak moyo sa kudos!”
37Natinreg nin maong a kanakman ran tutawo sa saytin narnge' ra ket wanran nitepet kona ni Pedro tan konran raruman apostoles, “Bubsat, ani edet a gaw'en mi?”
38Ket ni'bat na ni Pedro, “Pagbabawian moyoynay kukasalanan moyo tan pabawtismo kamon mangipa'kit a man'akuen moyayti si Jesu-Cristo. Gaw'en moyoyti ta pigaw nin pirdunawen nan Dios a kukasalanan moyo, tan ibi nayan rigalo komoyoy Ispirito na.
39Anaod, siin a nipangako' na para sa kaabigan moyo tan ran saray puri moyo, tan mataman saray tutawodtaw sa adayo' nin lulugar. Saytin nipangako' nan Uunuren a si Dios tamo ket para sa barang sayan sagyaten na nin umarak kona.”

Read Ginwa-ginwa' 2Ginwa-ginwa' 2
Compare Ginwa-ginwa' 2:8-39Ginwa-ginwa' 2:8-39