Ginwa-ginwa' 2:1-21

¹Sin pista ran Judio a mantawagen nin Pentecostes, nididinep sara sa sayay bali a sarba ran mammemper kona ni Jesus nin itaw sa Jerusalem.

²Kapingmatan, main nin narnge' ran bara'mon rumaweswes nin pinasyan kasaw nin siri nin ibat sa langit, a siti ket narnge' ya sa intiro nan bali a nididinepan ra

³tan naka'kit sara nin bilang dutan apoy nin bakas dila' a dinumpa-dumpa' sa barang saya konra.

⁴Ket nag'uray yay Ispirito nan Dios sa barang saya konra tan nakapag'irgo sara sa ambo' ran sarita' nin diri bana' sa pakababa' a nibi nan Ispirito nan Dios.

⁵Sin sain, main saradtaw sa Jerusalem a Judio nin madibusyon konan Dios, bale' abaw sara konra a nangibwat sa nagsikabarang a nunasyon.

⁶Sin narnge' raytaw a rumaweswes, nagsiarak saran nididinep itaw. Ket naka'ngap sara nga'min ta mangkarnge' rasaray mammemper nin mampag'irgo sa sarita' nan diri nin barang saya konra.

⁷Sa nipaka'ngap ran tuloy ket wanra, “Ambo' para a taga Galilea sarayti nin tutawo?

⁸Ket pa'no bale' a mangkarnge-karnge' tamoynan man'irgwen ra a irgo tamon diri?

⁹Si'tamo nin iti ket main nin taga sa Partia, sa Media, sa Elam, sa Mesopotamia, sa Judea, sa Capadocia, sa Ponto, sa Asia,

¹⁰sa Frigia, sa Pamfilia, sa Egipto. Main et nin taga sa lulugar sa nasyon nin Libya nin adani sa Cirene. Main anamaet et nin taga Roma nin Judio tan saray nasagyat sa pammemper nin Judio

¹¹tan main et nin tutawo sa Creta tan sa Arabia. Ket mangkarnge' tamon mampag'irgo sara sa uirgo tamon diri maipa'ka' sa makapaka'ngap nin ginwa-ginwa' nan Dios.”

¹²Kai ma'pos nin isipen nin barang saya a mampangyadi' ket kai nin mabulsu-bulsot a pittepetan ran wanra, “Ani kadi' a pipa'kaan nin sayti?”

¹³Main sara bale' a manuya'-tuya' nin wanra, “Nabok sarain tamo'!”

¹⁴Ket, nako ya sa adapan si Pedro nin kalamo' nasaray labinsaya et nin apostoles, mi'sa ya nag'irgo nin maksaw a wana, “Kababalyan tan sarba moyo nin mampiikap iti sa Jerusalem, rumnge' kamo pan maong tan andi' kamo nin malingo maipa'ka' sa mampangyadi'.

¹⁵Kai sara nin nabok ti nin tutawo nin bilang sa man'ipa'ka' moyo. Alas nwibi tamo' et nin buklas!

¹⁶No kai edet, saytin mampangyadi' ket say nipadles na ni Prupita Joel sin nu'nan panaon a wana:

¹⁷‘Wana nin Dios, “Sa panaon nin adapen ana nin kala'pusan, ibi koya nin sibubulos a Ispirito ko sa sarba. Ket saray ua'nak moyo, lulalaki man o bubbayi, mangipatanda' sara li' nin maipa'ka' kongko. Saray mangalalago' nin lulalaki, pa'kitan kosara li' nin bubagay a kai ra ma'kit nin raruman tutawo, tan saray mumasiken, manaynep sara li' nin say ipataynep ko konra.

¹⁸O', mataman konran uaripen ko, lulalaki man o bubbayi, ibi koya anamaet nin sibubulos a Ispirito ko sa saytaw li' nin panaon, ket mangipatanda' sara nin maipa'ka' kongko.

¹⁹Mangipa'kit ako nin makapaka'ngap nin mangya-mangyadi' sa langit, tan mumilagro nin paka'kitan iti sa luta'. Ma'kit li' sa luta' a daya', apoy tan makubpal nin asok

²⁰tan sa langit, dumedlem ya li' a awro tan umudit ya li' nin bilang daya' a bulan. Ket konan siin, rinmate' anaytaw si impurtantin panaon a si'kon si Dios ket mag'uray akon main nin pinasyan kaalakyan nin pakayadi'.

²¹Ket maisalba koyay si'numan a kidawat nin inganga'do kongkon si Uunuren.” ’