Gesami Hea:su 86:2-13

²Na bogosa:besa:le, Dia na gaga:ma! Bai na da Dima madelagi dagoi! Amaiba:le na gaga:ma! Na da Dia hawa: hamosu dunu amola na da Dima dafawaneyale dawa:sa.

³Di da na Gode! Amaiba:le nama asigi hou hamoma. Na da eso huluane Dima sia:ne gadolala.

⁴Hina Gode, Dia hawa hamosu dunu hahawane ganoma:ma! Bai na sia:ne gadobe da heda:le, Dima doaga:sa.

⁵Di da ninima hahawane gala amola ninima gogolema:ne olofosu amola mae fisili asigidafa hou da Dima sia:ne gadobe dunu ilima iaha.

⁶Hina Gode, na Dima sia:ne gadobe amo nabima, amola Dia na fidima:ne Dima dini iabe amo nabima.

⁷Bidi hamosu da nama doaga:sea, na da Dima wele sia:sa! Bai Di da na Dima sia:ne gadobe amo naba.

⁸Hina Gode, eno ‘gode’ Di agoai defele da hame gala. Enoga da Dia hamobe amo defele hamedafa hamosa.

⁹Fifi asi gala Dia hahamoi amo huluane da misini Dima ilia dialuma begudumu! Ilia da Dia hahamoi bagadedafa amo ba:le, Dima nodone sia:mu.

¹⁰Di da bagadedafa amola noga:idafa gala! Difawane da Gode.

¹¹Hina Gode, Di da na hamoma:ne hanai amo Dia nama olelema! Amola na da Dima molole fa:no bobogele amola Dia sia: didili hamomu. Na Dima mae fisili Dia hawa: hamosu hamoma:ne, nama olelema.

¹²Na: Hina Gode, na da na dogoga huluane Dima nodone sia:mu. Na da Dia gasa bagade hou amo mae yolele sisa:i lalumu.

¹³Dia nama asigi hou amo da mae yolele gebewane diala! Di da uli dogoi amo ganodini na dasa:besa:le, na noga:le gaga:i.