Gesami Hea:su 80:5-17

⁵Di da ninima se nabasu amo nabima:ne iasi. Amola Di da nini dinanoma:ne si hano faigeleiga nabai agoai ninima iasi.

⁶Di da nini guba:le fifi lai, ilia ninia soge amo sia:ga gegema:ne yolesi. Amaiba:le, ninima ha lai dunu ilia da ninima gadesa.

⁷Gode Bagadedafa! Nini Dima sinidigili misa:ne oule misa! Dia asigili gogolema:ne olofosu hou ninima ima! Amasea, nini da gaga:i dagoi ba:mu!

⁸Di da Idibidi soge amogainini waini efe gaguli misi. Di da eno fifi asi ili sefasilalu, ilia sogea amogai waini efe bugi.

⁹Di da amo efe bugi heda:ma:ne none yo abi. Amo efe bugi ea difi da gududafa sa:ili, Isala:ili soge huluane gigisila asi.

¹⁰Amo efe da gigisila asili agolo soge huluane ougigala:i. Amola ea amoda da agologa afufuli, dolo ifa bagadedafa amo ougihai.

¹¹Ea amoda da bu baligili sa:loba afufuli, Medidela:inia hano wayabo bagade bega: doaga:i amola asili Iufala:idisi hano bega: doaga:i.

¹²Abuliba:le Dia da amo efe bugi beba:le gagoi amo mugululi sanasibala:? Waha eno dunu amodili bobaligilalebe, ilia da amo efe fage wamo faili manusa: dawa:.

¹³Gebo sigua da amo waini efe sagai dogone muwane sala, amola sigua ohe da amo nana.

¹⁴Gode Bagadedafa! Ninima ba:le guda:ma! Hebene gadonini ninima ba:leguduma. Di da misini, Dia fi dunu gaga:la misa!

¹⁵Di da misini, waini efe Dia bugisi, amola gasa fili heda:ma:ne hamoi, amo noga:le gaga:ma.

¹⁶Ninima ha lai dunu amo waini sagai laluga ulagisili dadamuni sali dagoi. Dia ilima ougili ili gugunufinisima!

¹⁷Dia da fi Dia ilegei amola gasa bagade hahamoi, amo noga:le ouligima amola gaga:ma!