Gesami Hea:su 73:7-25

⁷Ilia dogoga, wadela:i hou fawane da gadili ahoa. Amola ilia asigi dawa:su ganodini ilia da mae fisili, wadela:i ilegesu fawane dawa:lala.

⁸Ilia da eno dunuma oufesega:lala, amola wadela:i liligi amo sia:daha. Ilia da gasa fili, eno dunu banenesimusa:, ilegelala.

⁹Ilia da Gode (Hebene ganodini esala) amo Ea hou olelesea, wadela:le sia:sa. Amola ilia da osobo bagade dunu ilima gasa fili, ilima agoane hamoma:ne sia:sa.

¹⁰Amaiba:le, Gode Ea fi dunu amolawane da ilima sinidigili, hanaiwane ilia sia:be huluane dafawaneyale dawa:sa.

¹¹Ilia da amane sia:sa, “Gode da ninia hou hame dawa:mu. Gadodafa Gode da ninia hamobe hame hogole ba:mu.”

¹²Wadela:i hamosu dunu da agoaiwane gala. Ilia da sadi dagoi, be eso huluane eno liligi lamusa: dawa:lala.

¹³Amaiba:le, na da udigili na hou ledo hamedei, amo udigili ouligibela:? Na da wadela:i hou mae hamone, noga:i hou fawane hamoi, agoane udigili hamobela:?

¹⁴Gode! Di da hahabe asili daeya huluane, na se nabima:ne hahamonesi. Hahabe huluane, Di da nama se bidi iasu.

¹⁵Be na da agoai sia: sia:noba, na da Dia fi dunu ilia sia:dafa agoane hame sia:na:noba.

¹⁶Na da amo gasa bagade hou ea bai dawa:ma:ne, asigi dawa:su logo hogoi helei. Be hamedei fawane ba:i.

¹⁷Amalalu, na da Dia Debolo diasu ganodini golili sa:i. Amalalu, na da wadela:i hamosu dunu ilima doaga:mu hou dawa:digi.

¹⁸Di da ili sadenama:ne soge amoga asunasimu. Amasea, Di da ili dafane gugunufinisimu.

¹⁹Ilia da hedolowane wadela:lesi dagoi ba:mu. Ilia da wadela:le dogonesi dagoi ba:mu.

²⁰Ilia da simasia ba:su amo da hahabe asi dagoi ba:sa, amo defele ba:sa. Hina Gode! Di da wa:legadosea, ilia da alalolesi dagoi ba:mu.

²¹Musa, na dawa:su da gamoga:i agoai galea, amola na dogo ganodini na da se nabaloba,

²²Na da gagaoui, ohe agoai galu. Na da Dia hou noga:le hame dawa:digi.

²³Be amowane, na da eso huluane di gadenene lela, amo Di da na lobolele lela.

²⁴Di da Dia olelebe amoga nama logo olelesa. Amola na da logo bidiga amogai doaga:sea, Di da nama nodone yosia:mu.

²⁵Na da Hebene ganodini fidisu dunu eno hame gala. Be Di fawane! Na da Di lai galeawane, na da osobo bagadega eno dunu hame hogomu.