Gesami Hea:su 71:2-20

²Bai Di da moloidafaba:le, na fidili gaga:ma. Na sia: nabawane, na gaga:ma!

³Dia na ougihalisima! Na gaga:musa:, na gagili salima! Di da na gagili salasu amola gaga:sudafa gala.

⁴Na Gode! Wadela:i amola dodona:gi dunu da na wadela:lesisa:besa:le, na gaga:ma!

⁵Hina Gode! Na da Dima dafawane hamoma:beyale dawa:sa! Na da na goihadini eso amoganini, Dima dafawaneyale dawa:su.

⁶Na da na esalusu huluane Dima fa:no bobogesu. Na lalelegei eso amoganini, Dia da na gaga:i. Na da eso huluane Dima nodone sia:mu.

⁷Na da Dia hou gasawane lalegaguiba:le, dunu bagohame da Dia hou lalegagui. Bai Di da na gasa bagade gaga:su dunu galu.

⁸Hahabe asili daeya, na da Dima nodone sia:sa amola Dia hadigi eno dunuma sisia:i laha.

⁹Na da da:i hamoiba:le, na mae higale yolesima! Na da da:i hamone gasa hamedeiba:le, na mae higale yolesima!

¹⁰Nama ha lai dunu da na fane legemusa: hanai gala. Ilia da na fane legemusa: ilegele sia:daha.

¹¹Ilia da amane sia:sa, “Gode da amo dunu fisiagai dagoi. Ninia da e bobogele, gagula:di! E gaga:mu dunu da hame gala.”

¹²Gode! Nama badiliadafa mae esaloma! Na Gode! Hedolo na fidila misa!

¹³Dunu amo ilia da nama doagala:sa, amo hasalasili, gugunufinisima:ma! Dunu amo ilia da nama se ima:ne hamosu dunu, amo gogosiama:ma!

¹⁴Na da eso huluane Dima dafawane hamoma:beyale dawa:lumu. Na Dima gebewane baligili nodone sia:nanumu. Dia gaga:su hou amo na dawa:mu gogolesa.

¹⁵Na da Dia noga:idafa hou amo eno dunuma sisia:i lamu. Be hahabe asili daeya huluane, na da Dia gaga:su amo sisia:i lamu.

¹⁶Ouligisudafa Hina Gode! Na da Dia gasa bagade hou amoma nodonanumu. Di fawane da noga:idafa. Dia noga:idafa hou amo na da sisia:i lamu.

¹⁷Dia da na goihadini esoganini nama Dia hou olelesu. Amola na da mae fisili, Dia ida:iwane hamosu hou sisia:i lala.

¹⁸Wali na da da:i hamone, na dialuma da gago aligi gala. Be Gode! Dia na mae fisiagama! Na da Dia gasa bagade hou fifi asi gala manebe dunu ilima sisia:i lasea, Di da ani galoma:ma.

¹⁹Gode! Dia moloidafa hou heda:le muagado doaga:sa. Di da liligi bagadedafa hahamoiba:le, dunu afae da Di agoai hame gala.

²⁰Di da nama bidi hamosu amola se nabasu amo huluane nama iasi dagoi. Be Di da na gasa bu nama imunu. Di da na bogoi uli dogoi amo gudu mae sa:ima:ne gaga:mu.