Text copied!
CopyCompare
GODE EA SIA: IDA:IWANE GALA - Gesami Hea:su - Gesami Hea:su 69

Gesami Hea:su 69:3-32

Help us?
Click on verse(s) to share them!
3Na da fidima:ne ha:giwane wele sia:nanebeba:le, gufia:i galebe. Na da:gisu da sesa. Na da Dia fidisu ba:musa: hogolalebeba:le, na si da seselei galebe.
4Dunu amo da nama bai hamedene ougisa, ilia idi da na dialuma hinabo idi amo baligisa. Nama ha lai dunu da na wadela:musa: bagadewane ogogosa. Ilia da gasa bagade amola na fane legemusa: hanai gala. Ilia da liligi amo na hame wamolai, amo nama samogele lai dagoi.
5Gode! Na wadela:i hou da Dima hame wamolegesa. Dia dawa:! Na da gagaoui hamoi dagoi.
6Ouligisudafa Hina Gode Bagadedafa! Na da dunu amo da Dima dafawaneyale dawa:be, ilima na da gogosiasu mae gaguli misa:ma! Isala:ili Gode! Na da dunu amo da Dima nodone sia:ne gadosa, ilima na da gogosiasu mae gaguli misa:ma!
7Na da Dima fa:no bobogebeba:le, nama ha lai da nama gadebeba:le, na da gogosiasu amoga dedeboi dagoi.
8Na nolalalia ilia siga, na da sofe misi dunu agoai ba:sa. Amola na sosogo fi da na ga fi misi dunu agoai ba:sa.
9Na da Dia Debolo Diasuga asigi hou da na dogo ganodini lalu agoane nesa. Dunu da Dima gadele sia:sea, na da Dima madelagiba:le, ilia da defele nama gadesa.
10Na da na hou asaboma:ne, ha:i mae nawene esala. Amola eno dunu da nama gadesa.
11Na da disa eboboi abula amoga gaga:sa. Amola ilia da na ba:le oufesega:sa.
12Ilia da logo bega: naba:le sia:daha. Amola adini ba:i dunu da nama oufesega:ne, gesami ge lasa.
13Be Hina Gode! Na da amo mae dawa:le Dima sia:ne gadomu. Dia eso ilegei amoga nama dabe adole ima. Dia da osobo bagade dunu ilima asigi bagadeba:le, nama adole ima. Bai Dia gaga:ma:ne ilegele sia:i, amo Di da hame gogolesa.
14Na da fafu amoga bosona dasa:besa:le, na gaga:ma! Nama ha lai dunu, ilia na fasa:besa:le, na gaga:ma! Na da hano lugudu amo ganodini magufasa:besa:le, na gaga:ma!
15Hano heda:i da na dedebole fane legesa:besa:le, na gaga:ma! Na da hano wayabo bagade lugudu amoga magufale gela dasa:besa:le, na gaga:ma! Na da bogoi uli dogoiga dasa:besa:le, na gaga:ma!
16Hina Gode! Dia da mae fisili, noga:idafa asigi hou dawa:. Amaiba:le, na sia:ne gadosu amoma adole ima. Nama ba:le guda:ma!
17Na da Dia hawa: hamosu dunu. Nama mae wamoaligima! Na da bidi hamosu bagadewane ba:sa. Wahadafa nama dabe adole ima.
18Nama misini, na gaga:ma! Nama ha lai da na hasalasa:besa:le, na gaga:ma!
19Nama ha lai dunu ilia da nama gadesa amola na gogosiama:ne hamosa. Dia da nama ha lai dunu huluane ba:lala.
20Ilia da nama bagadewane gadebeba:le, na da gala:la sa:i agoai ba:sa. Na da heawi agoai diala. Na da eno dunu ilia da nama asigimu, na da dawa:i. Be ilia da nama hame asigi galu. Ilia da na dogo denesima:ne, na da hanai galu. Be agoane hame ba:i.
21Na da ha:i galea, ilia da nama bogoma:ne ha:i manu iasu. Na da hano hanai galea, ilia da nama wadela:i gamoga:i waini hano iasu.
22Ilia lolo nasu da ili wadela:lesimu da defea. Ilia hamoma:ne sia:i lolo nasu da ilila: dafama:ne hamomu da defea.
23Gode! Dia ilia si wadela:lesima! Ilia baligi eso huluane gasa hamedenesima!
24Dia ougi hou ili da:iya soga:sima! Dia ougi hou da ilima baligili heda:ma:ma!
25Ilia fisisu sogebi da dunu hamedene ba:mu da defea! Ilia abula diasu ganodini, dunu afae esalebe hame ba:mu da defea!
26Ilia da dunu ilima Di da se iasu, ilima baligili se iaha. Ilia da dunu amo Dia da fa:ginisi, amo ilia se nabasu ba:beba:le, oufesega:ne sia: daha.
27Ilia wadela:i hou hamoi huluane dedene sa:i dialoma! Dia gaga:su amoga ilia afae mae lama:ma!
28Ilia dio Fifi Ahoanusu Meloa amo ganodini dedei dialebe, amo fadegama! Dia fi ilia dio dedei, amoga ilia dio mae dialoma:ma!
29Be na da heawini se bagade naba. Gode! Na gaguia gadole, amola na gaga:ma!
30Na da Godema nodone gesami hea:mu! Na da Ema nodobeba:le, Ea gasa bagade hou eno dunuma sisia:i lamu.
31Hina Gode da bulamagau gobele salasu amola bulamagau gawali noga:le dei, amo gobele salasu hahawane ba:sa. Be na da Ema dafawane nodosea, E da amo hou da ohe gobele salasu amo baligisa ba:sa.
32Banenesi dunu da amo hou ba:sea, hahawane ganumu. Dunu amo da Godema nodosu da amo hou ba:sea, dogo denesi dagoi ba:mu.

Read Gesami Hea:su 69Gesami Hea:su 69
Compare Gesami Hea:su 69:3-32Gesami Hea:su 69:3-32