Gesami Hea:su 50:1-20

¹Hina Gode Bagadedafa da sia:sa. E da osobo bagade fifi asi gala huluanedafa, gusudili asili guma:dini, ilima wele sia:sa.

²Saione Moilai Bai Bagade da isisima:goi ida:iwanedafa. Amoganini, Gode Ea hadigi da diga:sa.

³Ninia Gode da manebe. Be E da ouiya:lewane hame maha. Gegemoi lalu da E bisili ahoa. Amola mulu bagade da E sisiga:le disisa.

⁴E da Ea fi dunuma fofada:musa:, mu amola osobo bagade ba:su hou hamoma:ne elama ilegele wele sia:sa.

⁵E da amane sia:sa, “Na mae fisili fa:no bobogesu dunu, ilia da Nama gobele salawane gousa:su hamoi, amo huluane Nama gegedole oule misa!”

⁶Mu da amane sisia:laha, “Gode da moloidafa amola Hisu da fofada:su dunudafa!”

⁷Hina Gode da amane sia:sa, “Na fi dunu! Nabima! Na da sia:mu! Na da dilia, Isala:ili dunu dilima diwaneya udidimu. Na da Gode! Na da dilia Gode!.

⁸Dilia da mae fisili gobei gobele salasu Nama gaguli maha. Amoga, Na da dilima hame gagabole sia:sa.

⁹Be bulamagau gawali dilia afugi amoga lai amola goudi dilia goudi fofoi wa:i amoga lai, amo Na da hame hanasa.

¹⁰Bai ohe huluane iwilaga esala da Na: fawane. Amola bulamagau agolo osea:idafa amoga esala da Na: fawane.

¹¹Sigua sio huluanedafa da Na: fawane. Amola liligi huluane amo da moifufu sogega esalebe, da Na: fawane.

¹²Na da ha:i ganiaba, Na da dilima hame adola:loba. Bai osobo bagade amola liligi huluane amo ganodini gala da Na: fawane.

¹³Na da bulamagau gawali ilia hu nabela:? Na da goudi ilia maga:me nabela:? Hame naha!

¹⁴Be dilia Godema gobele salasu hou dafawanedafa da Ema nodone sia:su. Amola Hina Bagadedafa Ema dilia imunu ilegei amo huluane defele Ema ima.

¹⁵Bidi hamosu da dilima doaga:sea, Nama fidima:ne wele sia:ma! Amasea, Na da dili gaga:mu. Amola dilia da Nama nodomu.”

¹⁶Be Gode da wadela:i hamosu dunu ilima amane sia:sa, “Dilia da abuliba:le Na hamoma:ne sia:i amo sia: daha? Dilia da abuliba:le Na gousa:su hamoi, amoga fada:i sia: dahabela:?

¹⁷Na gagabole sia: amo dilia higasa. Amola Na hamoma:ne sia:i higale, nabawane hame hamosa.

¹⁸Dilia da nowa wamolasu dunu ba:sea, amo dilia dogolegei sama agoane hamosa. Amola dilia da inia uda adole lasu dunu ilima gilisisa.

¹⁹Dilia da eso huluane wadela:i hou fuligala:ma:ne sia:musa: momagele esala. Amola hedolowane ogogole sia: daha.

²⁰Dilia da diolalalidafa ilima diwaneya udidima:ne momagele esala. Amola ilia giadofai hogole, hedolowane olelesa.