Gesami Hea:su 46:3-10

³Amolawane, hano wayabo da goba gala:le heda:sea, amola agolo da gasa bagade igugusia, ninia da hame beda:mu.

⁴Amoga da hano gala. Amo hano da Gode Ea Moilai Bai Bagadega hahawane hou gaguli maha. E da Gadodafa Gode Ea Sema Diasu amoga hahawane hou gaguli maha.

⁵Gode da amo Moilai Bai Bagade ganodini esala amola amo Moilai Bai Bagade da hamedafa mugului dagoi ba:mu. E da hahabedafa amo Moilai Bai Bagade gaga:musa: misunu.

⁶Fifi asi gala da beda:gia:sa. Hina bagade ilia ouligisu soge da igugui dagoi ba:mu. Gode da gugelebe agoane sia:sea, osobo bagade da daeyane daha.

⁷Hina Gode Bagadedafa da nini esala. Ya:igobe ea Gode da ninia wamoaligisu sogebi gala.

⁸Hina Gode Ea hamoi ba:la misa! E da osobo bagadega fofogadigima:ne hahamoi, amo ba:la misa.

⁹E da osobo bagadega gegesu amo huluane gagabolesisa. E da oulali fifisa. E da goge agei wadela:lesisa. Amola E da da:igene ga:su liligi laluga ulagisa.

¹⁰E da amane sia:sa, “Gegesu yolesima! Amola Na da Godedafa, amo dawa:ma! Na da fifi asi gala huluane ouligisa. Na da osobo bagade fifi asi gala huluane ilima Ouligisudafa.”