Gesami Hea:su 38:6-18

⁶Na da se nabawane beguduli, gala:la sa:i. Na da hahabe asili daeya, mae fisili, dinana.

⁷Na da asugiba:le, da:i goaeasa. Amola na da bogomu gadenei ba:sa.

⁸Na da gasa hamedene, dafawane gala:la sa:i. Na da da:i dioi, amola se nababeba:le gayasa.

⁹Hina Gode! Na hanai amo Dia dawa:! Na gayabe huluane Dia naba!

¹⁰Na habe da ha:ha:sa, amola na gasa da asi dagoi. Na si da mobi sa:i dagoi.

¹¹Na da aiya bagohame madelaiba:le, na sama amola na na:iyado fi dunu ilia da nama hame gadenena maha. Na sosogodafa amolalia na hagasa.

¹²Dunu da na medole legemusa: dawa:be, ilia da na sa:ima:ne sanenisa. Amola dunu da nama se ima:ne dawa:be, ilia da na wadela:lesimusa: magagisa. Ilia da na wadela:lesimusa: sia: fane ilegesu hou hame yolesisa.

¹³Na da ge ga:i dunu defele, hame naba. Amola na da sia: hamedei dunu agoane, hame sia:da.

¹⁴Na da ge ga:iba:le, dabe adole imunu hamedei dunu agoai gala.

¹⁵Hina Gode, na da dima dafawaneyale dawa:sa, amola Di da na Hina Godeba:le, nama dabe adole imunu.

¹⁶Na da se nabasu baligilidafa nababeba:le, nama ha lai dunu da na mae habosesema:ma. Ilia da na dafai hou ba:beba:le, Dia mae habosesele sia:ma:ma!

¹⁷Na da maedafa fisili, se naba. Amola na da dafamu gadenei ba:sa.

¹⁸Na da na wadela:i hou sisane fofada:sa. Be na da amo dawa:beba:le, bagadewane beda:sa.