Gesami Hea:su 37:1-28

¹Wadela:i hamosu dunu ilia hou hamobeba:le, mae da:i dioma! Giadofale hamobe dunu da liligi bagade lasea, mae mudale ba:ma!

²Ilia da gisi amo da hedolo bioi gia:su defele, hedolowane alalolesimu. Ilia da bugi amo bioi gia:su defele, hedolo bogomu.

³Dilia! Hina Gode Ea hou dafawaneyale dawa:le, moloidafa hou hamoma! Soge amoga fifilale, gaga:iwane esaloma!

⁴Hina Gode Ea hou amo ganodini hahawane hou hogoi helema! E da dia dogoga, hanasu hou hamoma:mu.

⁵Dina: disu Hina Godema ima, amola Ema dafawaneyale dawa:ma! Amasea, E da di fidimu.

⁶E da dima moloidafa hou hahamonesimu. Amola Ea hamobeba:le, di da esomogoa eso diga:be agoai ba:mu.

⁷Hina Gode Ea hanaiga hamoma:ne, ha:aligima! Wadela:i dunu ilia da liligi bagade gagusia, amola hahawane wadela:i ilegesu hou amo hamosea, mae da:i dione ba:ma.

⁸Da:i dione amola ougili mae hamoma! Amoga da bidi hamosu fawane ba:mu.

⁹Be nowa dunu ilia da Hina Godema dafawaneyale dawa:sea, ilia fawane da osobo bagade ouligimu. Be wadela:i hamosu dunu da gadili sefasi dagoi ba:mu.

¹⁰Wadela:i hamosu dunu da hedolowane alalolesi dagoi ba:mu. Dia da ili hogoi helemu, be hame ba:mu.

¹¹Bodogi dunu da osobo bagade ouligimu. Amola bagade gaguiwane amola olofoiwane esalebe ba:mu.

¹²Wadela:i hamosu dunu da noga:le hamosu dunu amo wadela:lesimusa: ilegesa, amola ema higale ougili ba:sa.

¹³Be Hina Gode da wadela:le hamosu dunu iliba:le, ousa. Bai E dawa:. Ilia da hedolowane gugunufinisi dagoi ba:mu.

¹⁴Wadela:i hamosu dunu da hame gagui dunu amola moloidafa hamosu dunu medole legemusa:, ilia gegesu gobihei amo duga:le gadosa, amola ilia oulali disa.

¹⁵Be ilia da ilila: gegesu gobihei amogawane ilila: fane legei dagoi ba:mu. Amola ilia oulali da fifili sali ba:mu.

¹⁶Moloidafa dunu ea fonobahadi gagui da wadela:i hamosu dunu huluane ilia bagade gagui amo baligisa.

¹⁷Bai Hina Gode da wadela:i hamosu dunu ilia gasa fadegale fasimu. Be E da molole hamosu dunu ili gaga:mu.

¹⁸Hina Gode da Ea sia: nabawane hamosu dunu amo noga:le ouligisa. Amola Ea nana liligi da eso huluane ilia: fawane dialumu.

¹⁹Wadela:i eso da doaga:sea, ilia da se hame nabimu. Ha:i da doaga:sea, ilia da hame ha:gia:mu.

²⁰Be wadela:i hamosu dunu ilia da bogogia:mu. Hina Godema ha lai dunu, ilia da mosoi gilidabe defele gilisa:i dagoi ba:mu. Mobi da hedolowane geale asi. amo defele ilia da hedolowane alalolesi dagoi ba:mu.

²¹Wadela:i hamosu dunu da fa:no bidi imunusa: liligi udigili laha be fa:no hame iaha. Be noga:i dunu da hahawane mae dawa:iwane iaha.

²²Nowa dunu ilia da Hina Gode Ea hahawane dogolegele ba:su galea, ilia da osobo bagade nana liligi defele amo lamu. Be nowa da Ea gagabui amoga aligi galea, ilia da gadili sefasi dagoi ba:mu.

²³Hina Gode da dunu Ea masa:ne dawa:i logo, amoga masa:ne noga:le ouligisa. Amola E da nowa dunu amo da E nodoma:ne hamosa, amo noga:le gaga:sa.

²⁴Ilia da dafasea, gebe gudu hame dialumu. Bai Hina Gode da ili wa:legadolesimu.

²⁵Na da waha da:i hamoi dagoi. Na da fifi misi helei. Be na da Hina Gode noga:i dunu afae fisiagai amo hamedafa ba:i. Amola noga:i dunu ea mano ha:i manu hameba:le, edegenanebe hamedafa ba:i.

²⁶Noga:i dunu da eso huluane udigiliwane enoma sagosa. Amola e da enoma liligi bu hi lamusa: hahawane iasisa. Amola ea mano da eno dunuma hahawane dogolegele hamosa.

²⁷Wadela:i hamonanu fisiagale, moloidafa hou hamoma. Amasea, digaga fifi manebe da eso huluane esalalalumu.

²⁸Bai Hina Gode da moloidafa hou amoma asigisa. Amola E da Ea dafawaneyale dawa:be dunu amo hame fisiagasa. E da mae fisili, ili gebewane gaga:lala. Be wadela:i hamosu dunu iligaga fifi manebe dunu da gadili sefasi dagoi ba:mu.