Gesami Hea:su 22:6-27

⁶Be na da dunudafa agoai hame. Na da daba: agoai. Dunu huluane ilia da nama hagasa.

⁷Dunu huluane ilia da na ba:sea, nama lasogole oufesega:sa. Amola gona:su da:da:gini, dialuma fofoga:ne dodona:gisa.

⁸Ilia amane sia:sa, “Di da Hina Gode Ea hou lalegagui dagoi. E da abuliba:le di hame gaga:sala:? E da dima asigi galea, abuliba:le di hame fidisala:?”

⁹Di da na dudubuhadiga lalelegeba, Dia na noga:le ouligi. Amola na mano fonobahadiga, Dia na noga:le ouligi.

¹⁰Di da na dudubuhadigiga lalelegeba, Dia na noga:le ouligi. Di da eso huluane na: Gode esala.

¹¹Dia na mae yolesili esaloma. Se nabasu da nama gadenene misi. Be amomane na fidisu dunu da hame.

¹²Na ha lai dunu ilia da na sisiga:le halo daha. Amo da Ba:isia:ne bulamagau gawali ilia halo sa:i agoai.

¹³Ilia da laione wa:me agoane na gasomanusa:, ea lafi dagale amola bese ini gasomanusa: gesenenanebe ba:sa.

¹⁴Na gasa da hamedafa, amo da hano osobo da:iya sogadigi agoai. Na mese disisi da duduga:i agoane amola na dogo da daeane sa:i dagoi.

¹⁵Na gona:su amola da:gisu da mage da:gimu hamedei agoai gala. Amaiba:le, na gona:su da lafi gadofo bidiga legela heda:i diala. Dia da na mage hafoga:le bogoma:ne yolesi dagoi.

¹⁶Wadela:i bagade dunu ilia da na sisiga:sa. Wa:me gilisi agoai ilia na doagala:musa: maha. Ilia da na lobo amola emo a:le manusa: mina maha.

¹⁷Na da geloga:iba:le, gasa dabua ba:lala, amola na ha lai dunu ilia nama si godonasili sosodolala.

¹⁸Ilia da na abula lamusa: ululuasu hedelalu, abula momogili ladilala.

¹⁹Hina Gode! Na mae yolesiagama! Na gaga:musa:, hedolo misa.

²⁰Na da gobiheiga fane legesa:besa:le, hedolo gaga:ma. Wadela:i wa:me agoai dunu ilia na fane legesa:besa:le, Dia na esalusu gaga:ma.

²¹Laione wa:mega gasonasa:besa:le, gema! Sigua nimi bagade bulamagau gawali da na fane legesa:besa:le, Dia na gema.

²²Dia da nama noga:le hamoi. Dia nama hamoi, amo na fi dunu da gilisisia, na da ilima adole imunu.

²³Dilia! Hina Gode Ea hawa: hamosu dunu! Hina Godema nodoma! Dilia! Ya:igobe egaga fi dunu. Hina Godema nodone dawa:ma! Isala:ili fi dunu! Ema nodone sia:ne gadoma!

²⁴E da hame gagui dunu hame yolesisa, amola ilia se nabasu Ea dawa:lala. E da ilima hame baligi fa:sa, be ilia Ema fidima:ne wele sia:sea, E da alofesa.

²⁵Dunu huluane da gilisisu hamosea, na da Dia hamobeba:le, Dima nodomu. Dunu huluane da Dima nodone sia:ne gadosa, amo dunu ilia ba:ma:ne, na da gobele salasu na Dima imunusa: sia:i, amo hamomu.

²⁶Hame gagui dunu, ili sadima:ne, ili hanai defele manu. Nowa dunu da Hina Gode Ea hou lalegagusia, da Ema nodomu. Ilia da bagade gaguiwane mae bogole esalalalumu da defea.

²⁷Osobo bagade fifi asi gala huluane da Hina Gode dawa:mu. Ilia da sinidigili, Ema fa:no bobogemu. Fifi asi gala, sia: hisu hisu, amola hou hisu hisu da Ema nodone sia:ne gadomu.