Gesami Hea:su 19:5-13

⁵Eso da hahabe hahawane uda lamu dunu agoane maha. Amola e da hehenasu dunu defele hehenasu ganodini baligimusa: dawa:.

⁶Eso ea digagala:su da mu la:idi bega: asili la:idi bega: doaga:sa. Ea dogolo amoga wamoaligimu da hamedafa.

⁷Hina Gode Ea sema da ida:iwanedafa. Ea hamoma:ne sia:i da gasa gaheabolo ninima iaha. Hina Gode Ea hamoma:ne sia:i da moloidafa. Ilia da dawa:su hame gala dunu ilima dawa:su iaha.

⁸Hina Gode Ea sema da moloidafa amola nowa dunu ilia fa:no bobogesea da hahawane ganumu. Hina Gode Ea hamoma:ne sia:i da fofada:su moloidafa iaha, amola dunu ea asigi dawa:su amoga dawa:su noga:i iaha.

⁹Hina Godema nodone beda:su hou da noga:i. Amo hou da eso huluane dialalalumu. Hina Gode Ea fofada:su hou da eso huluane moloi fawane ba:sa.

¹⁰Hina Gode Ea sia: da gouli ida:iwane gala ea haboda:i amo baligisa. Ninia amo sia: hanaiwane dawa:mu da defea. Ea sia: da hedaidafa amola agime hano ea hedai amo baligisa.

¹¹Hina Gode! Na da Dia hawa: hamosu dunu. Amola Dia hamoma:ne sia:i da dawa:su nama iaha. Amola na da amoma fa:no bobogesea, Di da bidi nama iaha.

¹²Dunu da hi giadofasu, hi da hamedafa ba:sa. Hina Gode! Na wamo giadofale hamoi amoga Di na gaga:ma.

¹³Na da hanaiba:le wadela:le hamomu higa:i gala mabu. Wadela:i hou da nama hina agoane dialumu, na higa:i. Amaiba:le, Di gaga:ma. Amasea, na da ida:iwane ba:mu, amola wadela:i hou amoga afafai ganumu.