Gesami Hea:su 147:5-20

⁵Ninia Hina Gode da bagadedafa amola gasa bagadedafa. Ea asigi dawa:su amo afaega defemu da hamedei.

⁶E da fonoboi dunu wa:lesisa. Be wadela:i hamosu dunu, osoba banenesisa.

⁷Hina Godema nodone gesami hea:ma! Ninia Godema nodone sani baidama duma!

⁸E da mu dedeboma:ne, mu mobi baila:lesisa. E da osobo bagadema gibu iaha. E da agologa, gisi heda:ma:ne hahamosa.

⁹E da ohe fi ilima ha:i manu iaha. Guimi mano da ga:sea, E da ilima ha:i manu iaha.

¹⁰E da gasa bagade hosi amola nimi bagade dadi gagui dunu amo hahawane hame ba:sa.

¹¹Be E da fonoboi dunu amo da Ema nodobe amola Ea mae fisili asigidafa hou dafawaneyale dawa:be, amo dunu E da hahawane ba:sa.

¹²Yelusaleme fi! Hina Godema nodoma! Saione fi! Dilia Godema nodoma!

¹³E da dilia logo ga:su gasa bagadewane dialoma:ne hamosa. E da dilia fi dunuma hahawane hamosa.

¹⁴E da dilia soge alaloa gaga:sa. E da dili sadima:ne, widi ha:i manu noga:idafa dilima iaha.

¹⁵E da osobo bagadema hamoma:ne sia:sea, Ea sia:be liligi da hedolowane hamoi dagoi ba:sa.

¹⁶E da mugene su, abula agoai baila:lesisa. Amola anegagi ofo gulu agoane dudulisisa.

¹⁷E da mugene amo igi fofonobo agoane iasisa. E da anegagidafa eso iasisia, dunu afae da amo ganodini esalumu hamedei ba:sa.

¹⁸Amasea, E da amo hamoma:ne sia:sea, mugene ganumu da daeasa. E da fo iasisia, hano da ahoana.

¹⁹E da sia:ne iasu amo Ea fi dunuma iaha. E da Ea sema amola hamoma:ne sia:i amo Isala:ili fi ilima iaha.

²⁰E da eno fifi asi gala ilima agoane hame hamosu. Eno fifi asi gala, ilia da Ea sema hame dawa:. Hina Godema nodoma!