Gesami Hea:su 147:2-15

²Hina Gode da Yelusaleme ea hou bu hahamonana. E da mugululi asi dunu bu lale sala.

³E da baligili da:i dioi dunu amo ilia dogo denesisa. E da ilia fofa:gi lala:gisa.

⁴E da gasumuni ilia idi ilegei dagoi. Amola gasumuni afae afae ilia dio adosa.

⁵Ninia Hina Gode da bagadedafa amola gasa bagadedafa. Ea asigi dawa:su amo afaega defemu da hamedei.

⁶E da fonoboi dunu wa:lesisa. Be wadela:i hamosu dunu, osoba banenesisa.

⁷Hina Godema nodone gesami hea:ma! Ninia Godema nodone sani baidama duma!

⁸E da mu dedeboma:ne, mu mobi baila:lesisa. E da osobo bagadema gibu iaha. E da agologa, gisi heda:ma:ne hahamosa.

⁹E da ohe fi ilima ha:i manu iaha. Guimi mano da ga:sea, E da ilima ha:i manu iaha.

¹⁰E da gasa bagade hosi amola nimi bagade dadi gagui dunu amo hahawane hame ba:sa.

¹¹Be E da fonoboi dunu amo da Ema nodobe amola Ea mae fisili asigidafa hou dafawaneyale dawa:be, amo dunu E da hahawane ba:sa.

¹²Yelusaleme fi! Hina Godema nodoma! Saione fi! Dilia Godema nodoma!

¹³E da dilia logo ga:su gasa bagadewane dialoma:ne hamosa. E da dilia fi dunuma hahawane hamosa.

¹⁴E da dilia soge alaloa gaga:sa. E da dili sadima:ne, widi ha:i manu noga:idafa dilima iaha.

¹⁵E da osobo bagadema hamoma:ne sia:sea, Ea sia:be liligi da hedolowane hamoi dagoi ba:sa.