Gesami Hea:su 145:6-20

⁶Dunu eno da Dia gasa bagade hawa: hamosu, amo gilisili sia: sa:imu. Amola na da Dia noga:idafa bagade hou amo eno dunuma wele sia:mu.

⁷Ilia da Dia noga:idafa hou olelemu, amola Dia asigidafa hou olelema:ne, gesami hea:mu.

⁸Hina Gode da asigidafa amola gogolema:ne olofosu dawa:. E da hedolo hame ougisa amola mae fisili asigidafa hou dawa:.

⁹E da dunu huluanema noga:idafa hou hamosa. Amola Ea hahamoi liligi huluane amoma asigisa.

¹⁰Hina Gode! Dia hahamoi liligi huluane da Dima nodomu. Amola Dia fi dunu huluane ilia da Dima nodone sia:mu.

¹¹Ilia da Dia hadigi Hina Bagade Hou amo dawa:le, gilisili sia: sa:imu. Amola Dia gasa bagade hou eno dunuma olelemu.

¹²Amasea, dunu huluane ilia da Dia gasa bagade hawa: hamoi amola Dia hadigi Hinadafa Hou dawa:mu.

¹³Dia Ouligibi da eso huluane dialalalumu. Amola Di da eso huluane Hinadafa esalumu. Hina Gode da hamomusa: ilegele sia:i, amo mae fisili, didili hamosa. E da Ea hawa: hamosu huluane amo ganodini asigidafa hamosa.

¹⁴E da se nababe dunu fidisa. E da dafai dunu bu wa:lesisa.

¹⁵Esalebe liligi huluane da Di dafawane hamoma:beyale, dawa:lala. Amola ilia ha:sea, Di da ilima ha:i manu iaha.

¹⁶Di da ilima defele iabeba:le, ilia lamu dawa:i liligi lai dagoi ba:sa.

¹⁷Hina Gode Ea hawa: hamobe huluane da moloidafa amola asigidafa hamosa.

¹⁸Nowa da Ema molole sia:sea, E da amo dunu fidila maha.

¹⁹Nowa da Ema nodone dawa:sea, E da ilima ili lamusa: dawa:be liligi huluane defele iaha. E da ilia digini wele sia:be naba, amola ili gaga:sa.

²⁰Nowa da Ema asigi galea, E da amo dunu gagagulasa. Be E da wadela:i hou hamobe dunu gugunufinisimu.