Gehegehedira 15:13-28

¹³I murina toro kokoe soko tua, James te bosa me ghaghua, “Ghau na lei hoghogu, kau rongoviu mai!

¹⁴Simon Peter te bosa vanighita tua gaia God te diki tatea nina dolo vanira rana mua Jew me vilira balu ge kara nina vure.

¹⁵Ma eni te kalei na bosadira na lei prophet te vaghaa tara gerei tana Gegere tabu -

¹⁶“Gaia Lord te ghaghua, ‘I murina eni ku ghoi oli mai, mu ku ghoi talugoni olia na kinakabuna David. Mu ku ghoi kisu olia tana ravuna, mu ku ghoi ngasi laghini olia tana malana.

¹⁷Na pukuna eni na lei tinoni soko kara kene taoniu, gaira raini rana mua Jew tu vilira kara nigua na vure.

¹⁸Ma Lord te bosa, te tatei na lei totobo ini idania mai tua.’”

¹⁹“Vaghaa eni nigua na ghanaghana, ka bei lavibuleadira agaira itadira rana mua Jew tara tughulio mara taonia tua God.

²⁰E uto ge ka gerea na gegere ma ka bosa vanira ge kara bei ghania na vanga tara sukaghira nia na titinoni god, na pukuna na vanga keri te meto. Kara bei tangodika ma kara bei ghania gea na maumanu dodoko. Kara bei ghania na ghabu.

²¹Na pukuna nina lei vetena Moses, tara idumi alaalai mai tua idania i lokani na lei vale kokoeliulivuti ni Jew tana lei Sabbath mana lei bosana tara nighi tarai tana lei komu sule.”

²²Rana manevetena mana lei mane kamanagho kolura na vure holohoru udolu i Jerusalem tara padapada ge kara vilira balu mane itadira ma kara nira vetena va i Antioch kolura Paul ma Barnabas. Ma gaira tara vilira erua na mane - Judas tara holoa nia Barsabbas, ma Silas, rana mane raini gaira udolu rana taluutuni tara ghanaghana mavara.

²³Ma gaira tara hera na gegere moro nia tona, mana gegere eni te ghaghua, “Ighai na hoghomiu, na lei manevetena mana mane kamanagho, “Tai nia vetena vanighau nimami na kokoe ni holouto vanighau, ighau na lei hoghomami tau sivuragha itadira rana mua Jew mi taeni tau tautaluutini, mau ghahaghau i Antioch, mi tana lei bubulo i Syria mi Cilicia.

²⁴“Ighai tai rongovira na balu mane tara butu itamami te dika didira na kokoe te gunalighi na liomiu. Na hava tara gatu nea tara goni taboa na pukuna tara mua holaa siki kokoe ni hahanga itamami.

²⁵Ma keri ge ai kabukoukolu mai talamaghinia mai vilira na balu mai nira vetena gatu itamiu nia na tinoni holabosa. Ma gaira tara nira udukolu kulamami a Barnabas ma Paul,

²⁶rogaira toro lubatiolia na voladira udolu ta nina lutu dida na Lord Jesus Christ.

²⁷Vaghaa ke ge ai nira vetena vanighau gatu Judas ma Silas, gaira koro tutugua vanighau na lei totobo te vaghai tai gerei vanighau.

²⁸“Na Tarunga Tabu mi ghai tai nia dete kolu sakai vamua na ghanaghana, ge kai bei talua gea siki hohola te mava i vuvungamiu, ma raini vamua na vetena te manana kau goni taonighi: