Gehegehedira 11:15-30

¹⁵Mi tana bona inau tu vuivunia na kokokoe, na Tarunga Tabu te horu tua vuvungadira te vaghaa te horu mai vuvungada tana vuivuni.

¹⁶Mi nau tu ghanaghana olia, na hava Lord te bosa, ‘John te nia vulitabu na beti, mi ghau kau nia vulitabu ghua na Tarunga Tabu.’

¹⁷Te vaghaa God te hera tua rana mua Jew na sonihalavu ni Tarunga Tabu te vaghaa te vaheghita tana bona ta taluutunia Lord Jesus Christ, ma ahei inau ge ku tughuru pungisia God!”

¹⁸Tana bona tara rongovia, mara beto didira na kokoe koliliana, mara holoutoa vamua God mara ghaghua, “Itaeni God te vahera na maana vanira rana mua Jew ge kara tughulio ge kara vola.”

¹⁹Bona tara peta matea tua Stephen, na balu taluutuni tara havukaghi tana lei komu na pukuna na gunaguna, mara vaa sara Antioch mi tana bubulo Phoenicia mi tana koukomu lau Cyprus, mara tughunitatea iga na Rongorongo Uto vanira na Jew vamua.

²⁰Hauvaa mana balu tinoni taluutuni Cyprus mi tana komu Cyrene, tara vaa sara ghua Antioch, mara bosa tatea iga na rongorongo vanira rana mua Jew, maia nina Rongorongo Uto Lord Jesus.

²¹Ma nina maana Lord itadira, mana vure subo tara taluutunia mara liliu pulohi vania Lord.

²²E saravia na rongorongo na holohoru Jerusalem, vaho ge ra nia vetena Barnabas vaa Antioch.

²³Mi tana saraana vaho, ge vaevanea gaia God te vautora sughua nina vure me nira togo, me kokoe patupatura ge kara vavaravaghi utuni vania Lord, nia na tobadira udolu.

²⁴Barnabas na tinoni uto, me vonughia na Tarunga Tabu mana taluutuni, me subo ni tinoni tara mai mara va taluutunia Lord.

²⁵Ma Barnabas te tona Tarsus ge ke kenea Saul.

²⁶Me topoa tua ge hola vaa Antioch, mana niulu udolu rogaira toro vaukolu tadira na holohoru moro taraira na vure subo. Mi Antioch vaho rana taluutuni tara vuivunia na holoadira nia ‘Christian.’

²⁷Mi tana bongi eni, balu prophet tara rughuhoru mai Jerusalem, mara vaa sara Antioch.

²⁸Ma sakai itadira na ahana Agabus te tughuru dato ta nina maana na Tarunga Tabu, me bosadila na ngengere sule ke kalea na maramana. Me kale utuni na totobo eni, tana bongina Claudius na vunaghi haba ni Rome.

²⁹Ma sasakai tadira rana taluutuni ke nia hevei nina heveioli vanira lei hoghodira rana taluutuni tara kabu i Judea.

³⁰Mara nea te vaghaa eni, mara nighi vetena gatu didira heveioli, vanira lei mane kamanagho ni holohoru tana limadira Barnabas maia Saul.