Gaalu Sɛʋɛi 24:3-19

³Ɓalaame faalaalii nii laazeelini, é ɠɛ ma: «Ɓeyɔɔl ná-doun zunui Ɓalaame ná-keela wooi ɠaa, zunui nii gaazuzeɠeai ma, ná-keela wooi ɠaa,

⁴nui nii é GALA gooiti mɛnisu, naa ná-keela wooi ɠaa, é Zɛbɛi-Pɛ-Maliɠii ná-kulakɛlɛmai ɠaazu, siɛgi zu é loozu la suɠili, gaazuzeɠe ma:

⁵Ee Zakɔɓe, ɗa-zeɠe ɠotaiti wola ʋagɛ, ta è-ɲiizuʋɛti ɓalaa, Izelayɛle!

⁶Ti ɗa yei ga zuviega eɠɛ laasamagiti, eɠɛ kpeleiti, ti ziɛ ɠobaʋɛ, eɠɛ alɔwɛ gului, Maliɠii siingai, eɠɛ sɛdele gului, ti ziɛlaʋɛ.

⁷Ziɛi ɠa yeizu, é ɗa ɠula seizuʋɛ, ziɛ mɔinmɔingiti ta ná-ani zuwuiti fae. Ná-masagi ɠa zobogi zɔlɔɔ Agage ma, ná-masadai zɛbɛi ɠa wɔɔlɔ.

⁸GALA ge kulaʋɛ Ezipete yooi ʋa, teɠui zɛbɛi ɠɛɠalai ɠa é zea, toɠa zobo sɔlɔɔ ziiti ma, ti ga sili nuiti, é ti-ma ɠaeiti golowolo, é ti zɔ ga ná-mɛɛinti.

⁹Toɠa ɓili, é ʋɛɛ eɠɛ zala zinɛi, eɠɛʋelei zala zaai la, ɓɛ ɠa a kata ga é wuzeɠe? Nui nii a tuya loo è ʋɛ, tuya ɠa naa ʋɛ, nui nii a è voovo, foovooi ɠa naa zo.»

¹⁰Ɓalake yiiɠaawanani Ɓalaame ma, é yealoɠani, é ɠɛni Ɓalaame ma: «Gè è loligɛ ga è ʋa, è sìli nuiti foovo, wɛlɛ, ná zeizu ɠɛa saʋa, è ɗa tuya loo ti ʋɛ.

¹¹Tɛi é ɠɛa ɠana, liina ɗa-yooi zu! Gè boni ga nà faanɛɛ mɔinmɔin kɛ è ʋɛ, kɛlɛ Ɠɔoɠɔ GALAGI è ʋalagɛ faanɛɛiti sɔlɔɔ fai ma.»

¹²Ɓalaame Ɓalake wooɠaaʋoteni, é ɠɛ ma: «Gè ɓɔɛni ɠani keelaiti pɔ, è ti leʋeni mà:

¹³‹Anɛɛ ni Ɓalake ɠa ʋaazu ga walii ta zanugi, nii é ná-masa pɛlɛi laavegai, é fe zèa, gè la zooga faa nɔpɛ kɛɛzu ga ma ʋagɔ, ɓaa ma ɲɔu, Ɠɔoɠɔ GALAGI ná-devei laalɔɠɔma. Nà naa nɔ wo, nii Ɠɔoɠɔ GALAGI a bo mà.›

¹⁴Niizu nà ga li nà-nuɓusɛiti pɔ. Ʋa, nà naa lɛɛzu ga ɗe, nii Izelayɛle nuɓusɛiti ti ʋaazu kɛɛzu ga ɗa-nuɓusɛiti, yeeɠɛɠalaiti su ti ʋaazu.»

¹⁵Ɓalaame faalaalii nii laazeelini, é ɠɛ ma: «Ɓeyɔɔl ná-doun zunui Ɓalaame ná-keela wooi ɠaa, zunui nii gaazuzeɠeai ma, ná-keela wooi ɠaa,

¹⁶nui nii é GALA gooiti mɛnisu, naa ná-keela wooi ɠaa, nii é Anii-Pɛ-Unda ná-faaɠwɛgiti feai zea, é Zɛbɛi-Pɛ-Maliɠii ná-kulakɛlɛmai ɠaazu, siɛgi zu é loozu la suɠili, gaazuzeɠe ma:

¹⁷Nà pɛtɛsu, kɛlɛ niizu laade dɛ, nà sumɔsu, kɛlɛ maa la dɛ ɓuɠani, ʋelela ʋelei, somideɠai ta ɠa ɠulazu Zakɔɓe mavofodai zu, masadai ma lukpɔi ɠa ɠɛ Izelayɛle zaama, nii a ɠɛ Moaɓe nuiti goizu loɠazu, toɠa Sɛte ná-doun zunuiti kpein doɠa tɔungi zu.

¹⁸Toɠa Edɔme yooi zo, é ɠɛ ga nɔnɔ, sili nuiti su, Seyiil yooi ɠa zo, Izelayɛle ɠa ná-zeeɠaaɓaai lɛ.

¹⁹Nui nii é ɠulazu Zakɔɓe mavofodai zu, naa ɠa masadai ɠɛ, toɠa naati undaaʋili, niiti ti ʋelazu, ti ɠula taaiti ba.»