4GALA ge ɠulani kɛlɛma Ɓalaame ʋɛ, naa ɠɛni ma: «Gè zalaɠa ɠulazu lɔfela logɛ, gè nikɛ zinɛi ta baala sinɛi ɠulaʋɛ ga zalaɠai, zalaɠa ɠulazuʋɛ ɠilagilagi.»
5Ɠɔoɠɔ GALAGI wooi ʋuuni Ɓalaame la, é ɠɛ ma: «Ɠale ma Ɓalake ʋɔ bɛ, è ɓɔɛ pɔ ɠani.»
6Ɓalaame ɠaleni ma Ɓalake ʋɔ bɛ, nii é ɠɛni ná-gala zalaɠai ɠoba, ta Moaɓe ɠundiɠiiti.
7Ɓalaame faalaalii nii woni, é ɠɛ ma: «Moaɓe masagi Ɓalake zeɠeʋɛ ga ze Siili yooi zu gizeiti su. É ɠɛ mà: ‹Ʋa, è Zakɔɓe mavofodai voovo bɛ̀! Ʋa, è ɗa-yiiɠaawanai yei Izelayɛle laalɔɠɔma!›
8Nà naa voovoozu ɠale, nii GALA ge la foovooni? Nà yiiɠula ɠale nuɓusɛiti ma, siɛgi zu Ɠɔoɠɔ GALAGI yii la ɠulani la?
9Nà yɛsu fasa ɠizeiti unmaʋɛ, gè pɛtɛ, nà yɛna gizeiti unmaʋɛ, gè pɛtɛ, nuɓusɛ ʋe é zeizu yɛ, zɔɠɔzu ɠa ti ʋa ta zii zɔiti.
10Ɓɛ ɠa a zoo é Zakɔɓe mavofodai ma ʋɛbɛi ɠaalu, ɓaa é Izelayɛle nu ɓulugi ɠaalu? Gè za, eɠɛʋelei sɔle nui zaa ʋelei la. Gàaɓela ʋelei ɠɛ ga nɔnɔi ɠɛʋelei.»
11Ɓalake ɠɛni Ɓalaame ma: «Leeni ɠa è kɛa ga ze? Gè è zeɠeʋɛ ga è sìli nuiti foovo, wɛlɛ ɗa ba, è ɗa tuya loo ti ʋɛ!»
12É ɠɛni ma: «Nà ɠɛna ɓɔɛa, gè la naa woga ɓaa, nii Ɠɔoɠɔ GALAGI pua dà?»
13Ɓalake ɠɛ ma: «Ʋa pɔ̀ bɛ, de li ada taɠili, ʋɛ ɗa ti ɠa ná. Ɗa ti ɠilazuʋɛ nɔ ɠa, è la ti pɛ kaa, miná ɠa ɗa ti voovo ná nɔ̀un bɛ.»
14É liini la Sɔfime kpalagaʋɛ, Pizega gizei unmaʋɛ, é zalaɠa ɠulazu lɔfela lo, é nikɛ zinɛ ɠila ta baala sinɛ ɠila kula ga zalaɠai, ti ɠilagilagi maazu.
15Ɓalaame ɠɛni ma: «Lo ʋɛ ɗa-ɠala zalaɠai ɠoba, gè li munu, gè Ɠɔoɠɔ GALAGI laaɠomi.»
16Ɠɔoɠɔ GALAGI ɠulani kɛlɛma Ɓalaame ʋɛ, é wooi ʋu da, é ɠɛ ma: «Ɠale ma Ɓalake ʋɔ bɛ, è ɓɔɛ pɔ ɠani.»
17Ɓalaame ɠaleni ma Ɓalake ʋɔ bɛ, naa ɠɛni loni ná-gala zalaɠai ɠobaʋɛ, ta Moaɓe ɠundiɠiiti. Ɓalake ɠɛni ma: «Leeni ɠa Ɠɔoɠɔ GALAGI bogai?»
18Ɓalaame faalaalii nii woni, é ɠɛ ma: «Ɓalake wuzeɠe, è woilo! Sipɔɔl ná-doun zunui, woilo gòoi ma!
19GALA ge la ga nuɓusɛi, é ʋa zɛɛi wo, ɓaa nu vulu, é ʋa zeɠe kpɔɛ wooi ʋa. Nii é bogai, é la naa ɠɛa ɓaa? Toɠa woo wo, é la su vai ɠɛa?
20Wɛlɛ, gè devei zɔlɔɔga ga gè tuya loo, GALA ge tuya loa, gè la seɠezu ma.
21É la telebotala vaa ɠaani Zakɔɓe ʋa, é la sɔletala vaa ɠaani Izelayɛle nuɓusɛiti ba. Ɠɔoɠɔ GALAGI, é ga ná-GALAGI, naa ɠa tɔun polu, toɠa masadai ma ɠoozunɛɛi zɔlɔɔ ti ʋɔ bɛ.
Gaalu Sɛʋɛi 23
Gaalu Sɛʋɛi 23:4-21