Gaalu Sɛʋɛi 22:22-32

²²GALA ge yiiɠaawanani siɛ vai naa zu. Ɠɔoɠɔ GALAGI ná-geezuɠeelai loni pelei zu, é ɓesa tuɠɔ. Ɓalaame ɠɛni ná-soovale saai ɠɔma, ná-botiɠɛ nu felegɔ ʋilɛgai polu.

²³Soovale saai geezuɠeelai ɠaani, boɠa zɔkpɔi zea, kulaai maalaɠagi zu, é loni pele zaamaʋɛ. É zeɠeni pelei ʋa, é li ga dɔɓɔi zu ʋele. Ɓalaame tɔɔzeini ga doɠaa, é ʋaa la pelei zu.

²⁴Geezuɠeelai liini, é lo ɠoozama pele zokogi zu, leezɛn ɓeleiti zɔɠɔzu, kɔtu ziɠigi zɔɔla ʋele, é zɔɔla ʋele.

²⁵Soovale saai Ɠɔoɠɔ GALAGI ná-geezuɠeelai ɠaani, é ziɠa kɔtu ziɠigi ʋa, é Ɓalaame ɠɔɠɔi ɓata kɔtu ziɠigi ʋa. Naa ɓalaa tɔɔzeini ga doɠaa.

²⁶Ɠɔoɠɔ GALAGI ná-geezuɠeelai leʋeni ti ʋa mɔnɔ, é li, é lo pele ɓoɠologi zu, ʋɛ nu la zooga é ʋa leʋe ná, ga nu yeezazu ʋele, ɓaa nu ɠɔʋɛzu ʋele.

²⁷Siɛgi zu soovale saai kaani la, é ʋɛɛni zooi ma, Ɓalaame wu. Ɓalaame yiiɠaawanani, é tɔɔzei ga suloɠaa ga ná-tukpɔi.

²⁸Ɠɔoɠɔ GALAGI soovale saai laaʋɛ vieni, é ɓɔɛ Ɓalaame ʋɔ, é ɠɛ ma: «Leeni ɠa gè kɛai ga ɗe, è dòɠa ná zeizu ɠɛa saʋa?»

²⁹Ɓalaame gooɠaaʋoteni, é ɠɛ ma: «Mazɔlɔɔ è ɲɛɛɠulaʋɛ sù. Ee, ni boɠa zɔkpɔ ɠɛni zèa, gè ɠɛa è ʋaazu ɠani nɔ!»

³⁰Soovale saai gooɠaaʋoteni, é ɠɛ ma: «Nà laade gè ʋa ɠɛ ga ɗa-zoovale saai, nii ɗa ɗa zei kɔma yeenɔpɛ? Zekaa nɛi nà ɗa è zo da pɔlɔmazu ɓaa?» É gooɠaaʋoteni, é ɠɛ ma: «Ɓa!»

³¹Gaamago nɔ, Ɠɔoɠɔ GALAGI Ɓalaame ɠaazuʋɛ zeɠeni ma, é Ɠɔoɠɔ GALAGI ná-geezuɠeelai ɠa, é loni pele zaamaʋɛ, ná-boɠa zɔkpɔi zea, kulaai maalaɠagi zu. Ɓalaame ʋilɛni ɲiibiɠa, é nɔkɔ, é unpilɛ zooi ma.

³²Ɠɔoɠɔ GALAGI ná-geezuɠeelai ɠɛni ma: «Leeni vaa zu è ɗa-zoovale saai loɠaai ná zeizu ɠɛ saʋa? Nà ɠa pàai, gè pele leʋe è luɠɔ, mazɔlɔɔ siɛi nii è tɔɔzeiɗai, undaaʋili pelei ʋe.