Gaalu Sɛʋɛi 22:17-28

¹⁷Nà è wola wɔɔlɔ, nà naa pɛ kɛ, nii ɗa maaɠaazaɠabo mà. Kɛlɛ kɛni è ʋa, è nuɓusɛi tɛiti foovo bɛ̀.› »

¹⁸Ɓalaame Ɓalake ná-botiɠɛ nuiti gooɠaaʋoteni, é ɠɛ ti ma: «Anɛɛ ni Ɓalake ɠa ʋaazu ga walii ta zanugi, nii é ná-masa pɛlɛi laavegai, é fe zèa, gè la Ɠɔoɠɔ GALAGI, nà-GALAGI ná-devei tanɔpɛ koloɠologa, ma wola, ɓaa ma go.

¹⁹Kɛlɛ tama, wa ɓalaa, à yɛ ʋɛ za kpɔkɔi. Nà pɔ gè naa ɠwɛɛ, nii Ɠɔoɠɔ GALAGI ɠa pɔ é fai ta wo mà dɛ.»

²⁰Kpidii GALA ge ʋaani, é ɠɛ Ɓalaame ma: «Ni niima zunuiti ti ʋaa è lolisu, à li wa tiye. Kɛlɛ mina faa nɔpɛ kɛ, kɛni nii nà bona è ma.»

²¹Ɓalaame wuzeɠeni sobui, é ná-soovale saai maaɠili, ti li ta Moaɓe ɠundiɠiiti.

²²GALA ge yiiɠaawanani siɛ vai naa zu. Ɠɔoɠɔ GALAGI ná-geezuɠeelai loni pelei zu, é ɓesa tuɠɔ. Ɓalaame ɠɛni ná-soovale saai ɠɔma, ná-botiɠɛ nu felegɔ ʋilɛgai polu.

²³Soovale saai geezuɠeelai ɠaani, boɠa zɔkpɔi zea, kulaai maalaɠagi zu, é loni pele zaamaʋɛ. É zeɠeni pelei ʋa, é li ga dɔɓɔi zu ʋele. Ɓalaame tɔɔzeini ga doɠaa, é ʋaa la pelei zu.

²⁴Geezuɠeelai liini, é lo ɠoozama pele zokogi zu, leezɛn ɓeleiti zɔɠɔzu, kɔtu ziɠigi zɔɔla ʋele, é zɔɔla ʋele.

²⁵Soovale saai Ɠɔoɠɔ GALAGI ná-geezuɠeelai ɠaani, é ziɠa kɔtu ziɠigi ʋa, é Ɓalaame ɠɔɠɔi ɓata kɔtu ziɠigi ʋa. Naa ɓalaa tɔɔzeini ga doɠaa.

²⁶Ɠɔoɠɔ GALAGI ná-geezuɠeelai leʋeni ti ʋa mɔnɔ, é li, é lo pele ɓoɠologi zu, ʋɛ nu la zooga é ʋa leʋe ná, ga nu yeezazu ʋele, ɓaa nu ɠɔʋɛzu ʋele.

²⁷Siɛgi zu soovale saai kaani la, é ʋɛɛni zooi ma, Ɓalaame wu. Ɓalaame yiiɠaawanani, é tɔɔzei ga suloɠaa ga ná-tukpɔi.

²⁸Ɠɔoɠɔ GALAGI soovale saai laaʋɛ vieni, é ɓɔɛ Ɓalaame ʋɔ, é ɠɛ ma: «Leeni ɠa gè kɛai ga ɗe, è dòɠa ná zeizu ɠɛa saʋa?»