Text copied!
CopyCompare
GALA Sɛʋɛi - Gaalu Sɛʋɛi - Gaalu Sɛʋɛi 21

Gaalu Sɛʋɛi 21:5-20

Help us?
Click on verse(s) to share them!
5Ti tɔɔzeini ga ɓɔɛa GALA daalɔɠɔma ta Moize, ti ɗa ɠɛ ma: «Lee vaa zu wo gi ɠulaai Ezipete yooi ʋa, wo ʋa ga giye, gi ʋa za teʋebai zu? Mazɔlɔɔ ɓulu la ná, ziɛ la ná, niima maanɔɠɔ laamianigi wɔinzeɠea gi ma!»
6Názu ɠa Ɠɔoɠɔ GALAGI kaali ɲɔiti teʋeni la nuɓusɛiti daalɔɠɔma, ti ɗa ti ɲi. Izelayɛle nuɓusɛi zaani ga gola.
7Nuɓusɛiti ti ʋaani, ti Moize ɠa, ti ɠɛ ma: «Gi kotoi ɠɛɛni, siɛgi zu gi ɓɔɛa la Ɠɔoɠɔ GALAGI laalɔɠɔma ta ɗa ɓɔɠɔi. Niizu, soma è Ɠɔoɠɔ GALAGI maanɛɛnɛ, é kaali tɛiti kula gi ma!» Moize maanɛɛnɛi woni nuɓusɛiti bɛ.
8Ɠɔoɠɔ GALAGI gooɠaaʋoteni, é ɠɛ ma: «Kaalii ɓɛtɛ ga kɔlui, è sɛlɛ gulu ɠoozagi ʋa. Zɔi nɔpɛ kaali a ɲiina, é ɠaazuwuzeɠe, é wɛlɛ kaalii tɔna ba, naa la zaa.»
9Moize kaalii ɓɛtɛni ga kɔlu ɓɔigi, é sɛlɛ gulu ɠoozagi ʋa. É zo názu ma, nu nɔpɛ kaalii a la ɲiina, é ɠaazuwuzeɠe, é wɛlɛ kaalii ʋa, é ga kɔlu ɓɔigi, naa la mɔ ɠɛni za.
10Naa ʋoluma, Izelayɛle nuiti ti zeɠeni ti-ʋuuzuʋɛ, ti li, ti ʋu Wɔɓɔte.
11Ti zeɠeni miná, ti li Iye-Aɓalime, nii é teʋebai zu, gaaʋotegai Moaɓe yooi ma, folo ɠulazu ʋelei.
12Naa ʋoluma, ti liini, ti ʋu Zeelɛde nɛmɛi zu,
13naa ʋolu ti liini, ti ʋu ziɛ wolai Aalenɔn ʋolu ʋelei, ziɛi naa ɠa é yeizu teʋebai zu, é ɗa ɠula Amɔɔl nuiti ta-yooi zu, é ga kwɛpelegi Moaɓe yooi ta Amɔɔl nuiti ta-yooi yɔɠɔzu.
14Naa ɠa é ba, bogɛ é ɠole, Ɠɔoɠɔ GALAGI ná-kɔɔ vaiti ma zɛʋɛi zu ga: «Waɠɛɓe nii é Sufa, ta ma ɓekegiti, ta Aalenɔn,
15é ɓɔ ma ɓekegiti ba, ti yeizu Aal taai ʋɔ pelei, tiya ɠa ti ga Moaɓe ɠwɛpelegiti.»
16Ti zeɠeni miná, ti li Ɓeel. Kɔlɔyeɠei naa ná-fai ɠa é kɛɛni Ɠɔoɠɔ GALAGI ɠɛni Moize ma: «Nuɓusɛiti gaalɛ ba, nà ziɛi veezu ti ya.»
17Izelayɛle nuiti ti niima wuyei looni, ti ɠɛ ma: «Ziɛi ɠula kɔlɔyeɠei zu, é lɛ! À maamusɛi wo!
18À kɔlɔyeɠei ʋɛtɛ, nii kundiɠiiti ti bɔɔni, nii nu wolaiti ti bɔɔni ga ta-lukpɔi ta ta-ɓakɔiti.» Ti zeɠeni teʋebai zu, ti li Matana,
19ti li Naɠaliyɛle, ta Ɓamɔte.
20Ti liini nɛmɛi zu, nii é Moaɓe yooi zu, gizei nii daaseigi ga Pizega, naa unmaʋɛ, ʋɛ ná zɛlɛgai teʋebai maazu.

Read Gaalu Sɛʋɛi 21Gaalu Sɛʋɛi 21
Compare Gaalu Sɛʋɛi 21:5-20Gaalu Sɛʋɛi 21:5-20