24Kɛlɛ Izelayɛle nuiti ti vɔnini ma, ti ná-zooi pɛ seɠe, é zo ziɛ wolai Aalenɔn ma, nu yeezazu ʋelei, é li ziɛ wolai Yaɓɔke ʋɔ pelei, nu ɠɔʋɛzuʋɛ, eyɛsu é li Amɔn nuiti ta-ɠwɛpelemaʋɛ, folo ɠulazu ʋelei, ná makɛga ɠɛni de kpekpe.
25Izelayɛle Amɔɔl nuiti ta-laaiti kpein soni, é zei ti zu, Ɠɛseɓon taai la ma mɛɛ, ta maaɠoolii zu geleiti pɛ.
26Mazɔlɔɔ Ɠɛseɓon ɠɛni ga taa wola, ʋɛ Amɔɔl nuiti ta-masagi Siɠon ɠɛni zeini ná, é zo naama ziɛgi zu ma, é kɔɔi ʋɛɛni la Moaɓe masagi ʋa, é zooi kpein seɠeni, é zeeli ziɛ wolai Aalenɔn ma.
27Naa ɠa é ba, faaɠwɛ nuiti ti boni la, ti ɠɛ ma: «À ʋa Ɠɛseɓon! Siɠon ná-taai lo ʋolu, é lo ʋolu!
28Mazɔlɔɔ abui ɠa vukazu, é ɗa ɠula Ɠɛseɓon, abuzogi vazaga, é ɗa ɠula Siɠon ná-taazuʋɛ, é Aal ɠala Moaɓe yooi zu, ta Aalenɔn ada ɠaaɠoozagiti maliɠiiti.
29Maanɔɠɔi ɠa è ʋɛ, Moaɓe! È loa ya, Kemɔse ná-nuɓusɛi! È-loun zunuiti ti ʋela. È-loun anzanuiti ti ɠɛa ga Amɔɔl nuiti ta-masagi ná-duɔiti, ungo, Siɠon masagi.
30Gi gá-mɛɛinti pilini Amɔɔl nuiti ma! Niizu zooi pɛ ge ɠoloɠologa, é zo Ɠɛseɓon, eyɛsu é zeeli Diɓon. Eyɛsu é li Nɔfa, é li ɠite Meedeɓa, gi ti kpein koloɠoloni!»
31Zekana Izelayɛle nuiti ti zeini la Amɔɔl nuiti ta-yooi zu.
32Moize zou zuʋɛtɛ nuiti teʋeni, ti li, ti Yazɛɛl taai ʋɛtɛ. Taaiti kpein ti ɠɛni ba, Izelayɛle nuiti ti naati soni, ti Amɔɔl nuiti kpɛ ná.
33Naa ʋolu ti latini, ti li ga Ɓasan ʋele. Ɓasan masagi Wɔge ɠulani, ta ná-kɔɔɠɔ nuiti kpein, ti ti laaɠomi, ti ʋa kɔɔi ʋɛɛ ti ʋa Edeleyi.
34Ɠɔoɠɔ GALAGI ɠɛni Moize ma: «Mina lua tɔun ba, mazɔlɔɔ gè dɔa è yeezu, ta ná-kɔɔɠɔ nuiti kpein, é ʋɛɛ ná-zooi ʋa. Ɗa so, eɠɛʋelei è Amɔɔl nuiti ta-masagi Siɠon zoni da, nii é ɠɛni zeini Ɠɛseɓon.»
35Izelayɛle nuiti ti Wɔge ʋaani ta ná-doun zunuiti, ta ná-kɔɔɠɔ nuiti kpein. Nu ɠila kpalaa ge la ɠulani. Ti ná-zooi zoni.
Gaalu Sɛʋɛi 21
Gaalu Sɛʋɛi 21:24-35