Gaalu Sɛʋɛi 16:7-22

⁷ti ti laave ga abulekaiti, ti ani maku nɛɛnɛgi ʋu ga, Ɠɔoɠɔ GALAGI ɠaazu. Nii Ɠɔoɠɔ GALAGI a yiimazeɠe la, naa ɠa ɲadegai. É kula ɠɛa, Leevi ma zuwuzuiti!»

⁸Moize ɠɛni Kɔlee ma mɔnɔ: «À woilo gòoi ma ga pagɔ, Leevi nuiti!

⁹Naa ɠa wo ɠaazu ga faa go ɓaa, ga Izelayɛle ná-GALAGI yiimazeɠe ga woye yɛ, Izelayɛle nuɓusɛiti saama, é zobo fe wo ʋɛ, wo maaɓuɠa ba, wo ɗa botii ɠɛ Ɠɔoɠɔ GALAGI ná-seɠe ʋɛlɛ ɲadegai wu, wo lo nuɓusɛiti untuɠɔ, wo botii ɠɛ tɔun bɛ?

¹⁰É ma zobogi veeʋɛ wo ʋɛ ga wo ɗa maaɓuɠa ba, wa è-ɠɛɛleaiti, Leevi nuiti. Naa ɠa wo zalaɠa ɠula nui losuʋɛ ɠaiziɛzu mɔnɔ?

¹¹Naa ɠa é kɛa ɗa-o, ɗa-nuiti-yo, wo gilia ba, wo wuzeɠe Ɠɔoɠɔ GALAGI laalɔɠɔma! Mazɔlɔɔ Aalɔn ɠa ga ɓɛ, wo ʋa ɠɛ unsuyelii losu daalɔɠɔma?»

¹²Moize nu leʋeni ga ti Datan loli ta Aɓilame, Eliaɓe ná-doun zunuiti. Kɛlɛ ti ɠɛni ma: «Gi la liizu!

¹³È gi ɠula zou ʋagɔi ʋa, ʋɛ nɔnɔi ta kɔin gulɔi ʋooʋaai ná, é ʋa ga giye teʋebai zu ga gi za, faa go ɠana ɓaa? Ɗa ɠɛɛzu mɔnɔ, è zei gi unda ɓaa?

¹⁴È la ʋaani ga giye zou zu, ʋɛ nɔnɔi ta kɔin gulɔi ʋooʋaai ná! È la kpalagaa veeni gi ya, ɓaa kpelea ga gɔnɔ. Ɗa niima nuiti kpein kaazu ga gaazuɠole nuiti? Ɓa-o, gi la liizu pɛ!»

¹⁵Moize wola yiiɠaawanani, é ɠɛ Ɠɔoɠɔ GALAGI ma: «Mina yeezei ta-vebɛanii wu! Gè la ta-ɠɔli nɔpɛ kulani zea, folo ɠila ɓalaa, anɛɛ soovale gila pa, gè la dɛ faa ɲɔu ɠɛɛni ga taɠila ɓalaa!»

¹⁶Moize ɠɛni Kɔlee ma: «Ɗa-o, è ʋolu nuiti-yo, é ɓɔ Aalɔn ʋa, à ɠula kɛlɛma lina Ɠɔoɠɔ GALAGI ɠakala.

¹⁷Wo ɠilagilagi, ani maku nɛɛnɛ gala liɠii zeɠe, è ani maku nɛɛnɛgi ʋu su, è ʋa Ɠɔoɠɔ GALAGI ɠakala. Wa ʋa ga ani maku nɛɛnɛ gala liɠi unfelegɔ puulɔɔlugɔ (250), ɗa-o, Aalɔn-o, wo ɠilagilagi ɠa nɔnɔi zo ya.»

¹⁸Ti ɠilagilagi, ti ta-ani maku nɛɛnɛ gala liɠii zeɠeni, ti abulekaiti pu su, ti ani maku nɛɛnɛgi ʋu ga. Ti pɛ ti loni GALA daaɠomi seɠe ʋɛlɛi laaʋɛ, Moize ɓalaagi ta Aalɔn.

¹⁹Kɔlee bɛbɛi ɠaalɛɛni ba ti laalɔɠɔma GALA daaɠomi seɠe ʋɛlɛi laaʋɛ. Naazu, Ɠɔoɠɔ GALAGI ná-lɛbiyai ɠulani kɛlɛma bɛbɛi kpein bɛ.

²⁰Ɠɔoɠɔ GALAGI ɠɛni Moize ta Aalɔn ma:

²¹«À ɠula niima nuɓusɛiti saama, nà ti undaaʋilisu ɠaniɠanigi nɔ!»

²²Kɛlɛ Moize ta Aalɔn ti laaʋɛɛni zooi ma, ti maanɛɛnɛi wo, ti ɠɛ ma: «Ee, GALA! GALAGI nii deve kpɛtɛaniiti kpein zɛnvui ma, ɗa ʋaazu bɛbɛi kpein sosu ga nu ɠilagi ná-kotoi?»