Gaalu Sɛʋɛi 15:4-18

⁴Wa vebɛaniiti kpɔ zalaɠa zua ɠilagilagi pɛ ba. Wa ɓulu vukɔ ʋagɔi kilo saʋagɔ ɓɔ ba, gaayɔgai ga gulɔi litɛlɛ ɠila ta tukpɛ (1,5),

⁵ta puya zalaɠai ɠɛ ga dɔɔi litɛlɛ ɠila ta tukpɛ (1,5), ni zalaɠa zuai ɠa ga baala ziʋoi.

⁶Ni baala sinɛ wolai ʋe, wa vebɛanii ɠɛ ga ɓulu vukɔ ʋagɔi kilo lɔzita, gaayɔgai ga gulɔi litɛlɛ felegɔ,

⁷ta puya zalaɠai ɠɛ ga dɔɔi litɛlɛ felegɔ. Naama zalaɠaiti makugi ɠa nɛɛ Ɠɔoɠɔ GALAGI ʋɛ.

⁸Ni nikɛ zinɛi ɠa wo kulazu ga zalaɠai Ɠɔoɠɔ GALAGI ʋɛ, é ɠɛ ga gala zalaɠai, ɓaa minazeɠe daazeeli zalaɠai, ɓaa é ɠɛ ga ziilɛi zalaɠai,

⁹wa ɓulu vukɔ ʋagɔi kilo taaʋuugɔ ɓɔ ba ga vebɛanii, gaayɔgai ga gulɔi litɛlɛ saʋagɔ,

¹⁰ta puya zalaɠai ɠɛ ga dɔɔi litɛlɛ saʋagɔ. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.

¹¹«Pele ɠana wo maanɛai wo nikɛ zinɛ zalaɠai ɠula la, ɓaa baala sinɛi, ɓaa baala sinɛ yiʋoi, ɓaa boli yiʋoi.

¹²Toganii mɔin ʋa ʋele-o-ʋele, vebɛanii ɠa ʋɛɛ ti ɠilagilagi ʋa.

¹³Izelayɛle nu ɓɔɔɓɔgi kpein maanɛɛʋɛ é naama lɔgi zo, a ɠɛna zalaɠai ɠulaa, nii abui galazu, makugi nɛai Ɠɔoɠɔ GALAGI ʋɛ.

¹⁴Tɔ gilagi naa nɔ ɠa a zei nuɓusɛi pɛ ma, ga faa ɠila nɔ anɛɛ wɛɛin é ga seikɔɠɔma nui, ɓaa ná-pɛlɛyeɠei wo zaama wo-mavofodaiti kpein su, ni ta pɔ ti zalaɠa ɠula, nii abui galazu, makugi nɛai Ɠɔoɠɔ GALAGI ʋɛ.

¹⁵Nuɓusɛi pɛ ka tɔgi naa zo, ga faa ɠila nɔ toɠa la ɛsɛ gilagilagi pɛ ma, Izelayɛle nu ʋɛɛ seikɔɠɔma nu ʋa. Naa ɠa ɠɛ ga ɠɔoɠɔ tɔgi, wo-mavofodaiti kpein bɛ, ta seikɔɠɔma nui, Ɠɔoɠɔ GALAGI ɠaazu.

¹⁶Tɔ gilagi, ta deve ɠilagi nɔ ɠa a ɠɛ ná wo pɛ bɛ, wa seikɔɠɔma nui.»

¹⁷Ɠɔoɠɔ GALAGI ɠɛni Moize ma:

¹⁸«Ɓɔɛ Izelayɛle nuiti pɔ, è ɠɛ ti ma: Siɛgi zu wo zeelizu la zooi zu, ʋɛ gè losu wo luɠɔ, wo li ná,