Gaalu Sɛʋɛi 13:27-31

²⁷Wɛlɛ poluvaawo gooi ʋa, ti boni Moize ma: «Gi zeelini zooi naa zu, ʋɛ è gi leʋeni ná. Gaama zu, zou ʋe, ʋɛ nɔnɔi ta kɔin gulɔi ʋooʋaai ná, naa wulu waaiti pɛtɛ.

²⁸Kɛlɛ-o, nuiti ti zeini ná, ti wola zuɓaaʋɛ. Taaiti bɔɔlɔʋɛ, siɠigi ti ma. Gi Anake mavofodaiti ɓalaa pɛtɛgɛ ná.

²⁹Amalɛke nuiti ta zeini nu yeezazu ʋelei. Ɠɛte nuiti, ta Yeeɓuse nuiti, ta Amɔɔl nuiti ta zeini gize yooi zu. Kanaan nuiti ta zeini Kpoloɗɛ Wolai laaʋɛ, ta Zuludɛn nɛmɛi zu.»

³⁰Názu ɠa Kalɛɓe ɠaaɓaani la ga é nuɓusɛiti gaaɓɛ, niiti ti tɔɔzeini niina ga wuzeɠea Moize laalɔɠɔma. É ɠɛni ti ma: «Ade li ná! Ada vɔni zooi ma, de seɠe. Mazɔlɔɔ ma ɠaaɓaai ɠa ade ya.»

³¹Kɛlɛ zunuiti ti ɠɛni ga ná-siɛpoluiti, naati ti ɠɛni ɠɛɛzu ma: «Ma zobo ge la ade ʋɛ, de ʋa laalɛ nuuma nuɓusɛiti bu, mazɔlɔɔ ti zuɓaaʋɛ de ʋa.»