Gaalu Sɛʋɛi 11:9-33

⁹É ɠɛni ʋuuzu kpidii ti-ʋuuzuʋɛ, ta nɔɗai.

¹⁰Pɛlɛyeɠei ɠilagilagi ʋuuni ná-seɠe ɠotai laaʋɛ, é ɗa kpeei loo. Moize nuɓusɛiti gooi mɛnini, ti ɗa wɔlɔ. Ɠɔoɠɔ GALAGI wola yiiɠaawanani. Moize wola ɠaazuɠilini.

¹¹É ɠɛni Ɠɔoɠɔ GALAGI ma: «Lee vaa ɲɔu ɠa è kɛɛzu ga ze, nɛ̀i gè ga ɗa-wotiɠɛ nui? Lee vaa zu gè la zaalai zɔlɔɔni è ɠaazu? Ɗa zoo ɠale è niima nuɓusɛiti kpein ta-ɠasɔi la nɔ̀un unma?

¹²Nà ɠa gè niima nuɓusɛiti kpein sɔlɔɔga ɓaa? Nà ɠa gè ti ʋilɛga etea ɓaa, è ɠɛɛzu mà: ‹Ti ʋɛɛ yii la, eɠɛʋelei doun deei a ɗa ná-ɲiimiɓɔlegi zo la,› gè naa ɠɛ eyɛsu gi zeeli naama yooi zu, nii è ma minazeɠe boni ti-mɛmɛwolani bɛ, ga ɗa feezu ti ya?

¹³Mini ɠa nà suai zɔlɔɔna, gè ʋa gaaɠwɛ niima nuɓusɛiti kpein ba, ti wɔlɔzu kòba, ti ɗa ɠɛ ma: ‹Suai ve gi ya, gi mi!›

¹⁴Gè la zooga, nà ɠila ko, gè ʋa niima nuɓusɛiti kpein ta-ɠasɔi zeɠe. Gola wuiʋɛ mà!

¹⁵Ni ɗa pɔ è zaalai la mà, zɛ̀nvui zeɠe, aisa è ʋa sò ɠani, gè mina nà-maanɔɠɔi ɠa!»

¹⁶Ɠɔoɠɔ GALAGI ɠɛni Moize ma: «Zunu ʋuulɔfela (70) ɠaalɛ ba bɛ̀, è ti ɠula Izelayɛle ɠundiɠiiti saama, zunui niiti è ti ɠwɛɛ ga ta ga sɔɓelama nua, nuɓusɛiti ta-ɠundiɠiiti. Ʋa ga tiye GALA daaɠomi seɠe ʋɛlɛi laaʋɛ, wo lo ná ʋɔɔma, wa tiye.

¹⁷Nà yeizu ná, gè ɓɔɛ è ʋɔ, nà ta zeɠe zɛnvui naa ʋa, nii é è ʋa, gè fe ti ya, naa ɠa a kɛ, wo niima nuɓusɛiti ta-ɠasɔi zeɠe ʋɔɔma, ɗa ɠila è mina mɔ seɠe.

¹⁸Ɗa ɠɛ nuɓusɛiti ma: ‹À ɓɔɠɔ ɲade lina voloi vaa zu, wa ʋaazu suai miizu, tɔɔzei wo wɔlɔʋɛ Ɠɔoɠɔ GALAGI woizu ga: Ee, ni gá la zoo gi sua mi! Gi ɠɛa gaanɛ zu Ezipete yooi zu! Naa ɠa é ba, Ɠɔoɠɔ GALAGI ɠa ʋaazu suai veezu wo ya, wo mi.

¹⁹Wa ʋaazu miizu ɠɔ, é la nɔ ga folo ɠila faa, ɓaa folo felegɔ, ɓaa folo lɔɔlugɔ, ɓaa folo puugɔ, ɓaa folo ʋuufelegɔ (20).

²⁰Kɛlɛ wa yɛsu miizu eyɛsu alu gila, eyɛsu é ɠula wo-zokpai zu, unpili wɔin ɗa wo zo. Mazɔlɔɔ wo Ɠɔoɠɔ GALAGI ʋɛlɛʋiliga, nii é wo zaama, wo wɔlɔa gaazu, wo ɠɛ ma: Leeni vaa zu deɠɛmu gi zeɠeai Ezipete yooi zu?› »

²¹Moize gooɠaaʋoteni, é ɠɛ ma: «Niima nuɓusɛiti gè ti zaama, gá ga zunu waaundɔzita (600 000), è minazeɠe naati bɛ ga ta suai mi alu gila daawu ɲɛgɛlɛin!

²²Ta baalagiti paa ti ʋɛ, ta nikɛiti, é ʋa kula ɠɛ ti ʋa? Anɛɛ ni nu ɠa kpoloɗɛi wu ɠaleiti kpein kpɛɛzu ti ʋɛ, toɠa kula ɠɛ nɛi?»

²³Ɠɔoɠɔ GALAGI gooɠaaʋoteni, é ɠɛ ma: «Ɠɔoɠɔ GALAGI yee ɠa wola ɓuɠa ɓaa? Su la mɔ ɠoozani, ɗa naa ɠa, ni ɠite ʋe, ɓaa zɛɛ ʋe, ga ni nii nà bo, toɠa ɗa ʋilɛ su.»

²⁴Moize ɠulani, é Ɠɔoɠɔ GALAGI laawooi wo nuɓusɛiti ma. Naa ʋolu, é zunu ʋuulɔfelaiti (70) gaalɛɛni ba, ta-ɠundiɠiiti saama, é ti lo seɠe ʋɛlɛi maaɠoolii zu.

²⁵Ɠɔoɠɔ GALAGI yeini tonaɓiingi zu, é ɓɔɛ pɔ. Zɛnvui nii é ɠɛni Moize ʋa, é ta zeɠeni naa ʋa, é fe kundiɠi ʋuulɔfelaiti (70) zea. Siɛgi zu zɛnvui yeini la ti ma, ti tɔɔzeini ga ɓɔɛa eɠɛ GALA goo wo nua, kɛlɛ ti la ɠɛni lɛbini ga.

²⁶Zɛnvui yeini ɓalaa zunu felegɔ ma ti-ʋuuzuʋɛ, gilagi laaseigi ɠɛni ga Eledade, zɔi laaseigi ɠɛ ga Meedade. Zɛnvui yeini ti ma, mazɔlɔɔ ti-laaseigi zɛʋɛni zunu ʋuulɔfelaiti (70) saama, kɛlɛ ti la ɠɛni zeɠeni ti-ʋuuzuʋɛ, ti ʋa li seɠe ʋɛlɛi ʋɔ bɛ. Ti tɔɔzeini ga ɓɔɛa eɠɛ GALA goo wo nua.

²⁷Zunu loungoi ta ɓizɛni, é li, é bo Moize ma, é ɠɛ ma: «Eledade ta Meedade ta GALA ná-kulakɛlɛma vaiti bosu ade-ʋuuzuʋɛ.»

²⁸Nun ná-doun zunui Zozuwe, nii é ɠɛni ga Moize ná-kpɔba nui, é zo ná-doungo ziɛgi zu ma, naa ɠɛni ma: «Màliɠii, Moize, pele leʋe ti luɠɔ, ti ɓe naa ɠɛɛzu!»

²⁹Moize ɠɛni ma: «Ɗa mà lolo ɠulazu? Ɠɔoɠɔ GALAGI ná-Zɛnvui yei Izelayɛle nuɓusɛiti pɛ ma, ti ɠɛ ga GALA goo wo nuiti!»

³⁰Moize ta Izelayɛle ɠundiɠiiti ti ɠaleni ma ti-ʋuuzuʋɛ.

³¹Ɠɔoɠɔ GALAGI fiilɛi leʋeni kpoloɗɛi ɠa, é ʋa ga kakalogiti, ti ʋu ti-ʋuuzuʋɛ maaɠoolii zu, é ɠaku ná ma ga folo ɠila siɛ liegɔ. Ti zooi maaɓidini, eyɛsu é lɛ ga mɛtɛlɛ ɠila sɔligɔ.

³²Nuɓusɛiti ti loni ɠɔɠɔma naama voloi, ta ma ɓidii kpein, ta mɔnɔ poluma voloi ɲɛgɛlɛin, ti ɗa kakalogiti so. Nu nɔpɛ ge la ɠɛni seɠeni, é ʋa yei kilo waasaʋagɔ (3 000) zeeɠɔɠɔwu. Ti ti zuvieni, ti ɗa fɔ ti-ʋuuzuʋɛ maaɠoolii kpein su.

³³Suai naa yɛni nɔ ti-laaʋɛ, ti la dɛ numani, eyɛsu Ɠɔoɠɔ GALAGI yiiɠaawana ti ma, é maanɔɠɔi ʋɛɛ nuɓusɛiti ba.