Gôliŋwaga 6:5-19

⁵Êsêac sêô lasê tonêŋ bulimakao ma nêŋ becobogeŋ sêwê têtôm lêsêc. Lau teŋ sêsa êsêac to nêŋ kamele sa têtôm atom. Êsêac sêô lasê ma seseŋ gamêŋ tau ŋagêŋ samob su.

⁶Tec lau Israel sêpô lêna tauŋ ŋanô kêtu êsêacŋa ma lau Israel aweŋ gêjac Apômtau gebe ênam êsêac sa.

⁷Gêdêŋ taŋ lau Israel aweŋ gêjac Apômtau kêtu lau Midianŋa naŋ,

⁸Apômtau kêsakiŋ propete teŋ gêdêŋ êsêac ma kêsôm gêdêŋ êsêac gebe “Apômtau, lau Israel nêŋ Anôtô, kêsôm biŋ tonec gebe Aê kakôc amac asa aŋga Aiguptu amêŋ to gawê amac awi andu gêŋômaŋa siŋ.

⁹Aê gajam amac sa aŋga lau Aiguptu lemeŋ to aŋga lau samob, taŋ sêkôniŋ amac naŋ, lemeŋ amboac tonaŋgeŋ ma kajanda êsêac gamuŋ amac ma kakêŋ lau tau nêŋ gamêŋ gêdêŋ amac.

¹⁰Aê kasôm gêdêŋ amac gebe ‘Aê Apômtau, amacnêm Anôtô. Amac aŋgôŋ lau Amor nêŋ gamêŋ, mago anam sakiŋ lau Amor nêŋ anôtôi jaba atom.’ Mago amac akêŋ taŋem ŋoc biŋ atom.”

¹¹Go Apômtaunê aŋela mêŋgêô lasê ma gêŋgôŋ kamem, taŋ kêkô malac Opar ŋagala naŋ ŋalabu. Joas aŋga Abiesernê gôlôac kêtu ka tau ŋatau. Joas latu Gideon kêka polom kelecgeŋ gêmoa sêka wain ŋamala, gebe êsiŋ polom ôkwi kêtu lau Midianŋa.

¹²Ma Apômtaunê aŋela gêô lasê gêdêŋ eŋ ma kêsôm gêdêŋ eŋ gebe “O siŋsêlêc, Apômtau gêwiŋ aôm.”

¹³Ma Gideon kêsôm gêdêŋ eŋ gebe “O ŋatau, Apômtau embe êwiŋ aêac, go gêŋwapac samob êtap aêac sa êtu asageŋŋa. Ma gêŋsêga samob, taŋ tameŋi sêjac miŋ gêdêŋ aêac naŋ ma sêsôm gebe ‘Apômtau kêkôc aêac asa aŋga Aiguptu amêŋ atom me, gêŋsêga tonaŋ ŋanô ondoc.’ Galoc Apômtau kêtiŋ aêac su to kêkêŋ aêac asêp Midian lemeŋ.”

¹⁴Go Apômtau kêjatu eŋ gebe “Aê tauc jasakiŋ aôm ôna tonêm ŋajaŋa, taŋ gêc aômŋa naŋ, gebe ônam lau Israel sa aŋga lau Midian lemeŋ.”

¹⁵Gideon gêjô eŋ awa gebe “O Apômtau, aê oc janam lau Israel sa amboac ondoc. Ôlic acgom, aêŋoc lau têtu Manasenê gôlôacnêŋ lau ômbôêŋ-ômbôêŋ ma aê tauc katu ŋoc launêŋ ŋac ŋamuŋa tau.”

¹⁶Ma Apômtau kêsôm gêdêŋ eŋ gebe “Aôm kôtôm gebe ôŋgôm gêŋ tau gebe aê oc janam aôm sa. Aôm oc ôku lau Midian tulu amboac kôku ŋac tageŋ tulu.”

¹⁷Gideon gêjô eŋ awa gebe “Aê embe janac aôm matamanô ŋajam, naŋgo ôwaka taôm sa ŋa gêŋtalô teŋ, gebe aôm taôm tec kôsôm biŋ gêdêŋ aê.

¹⁸Aê jateŋ aôm gebe ôwi gamêŋ tonec siŋ atom e jamu jandêŋ aôm jamêŋ êtiam acgom. Aê gabe jakêŋ moasiŋ teŋ êtu da êndêŋ aôm.” Ma eŋ kêsôm gebe “Aê oc jamoa e ômu ômôêŋ.”

¹⁹Amboac tonaŋ Gideon kêsô nê andu gêja ma geno noniŋ ŋalatu teŋ ma kêkôc polom matac laclu kapôêŋ teŋ gebe êpac polom, mago kêkêŋ jist kêsêp atom. Eŋ kêkêŋ gwada kêsêp gadob ma sulu kêsêp ku, kêkôc gêŋ tau gêdêŋ Apômtaunê aŋela gêja kamem ŋalabu.