FƐCANYƐ̀NFƐ̀ 8:3-10

³A nɔ̀ùtɛ̀ cɑ̃̀nkutɛ̀ nceú n yuu kɛ̀ tɛyoutɛ n hɔrí.

⁴Sedisɑdɛmmu kó isɑpùmbí n di bɑ́ɑ́mmu, di bɑ́ɑ́ entɛ mɛdɔ́kùmɛ̀, di bɑ́ɑ́ mɛ̀ èntɛ kɛ̀ mɛ̀ mɔ̀nnì mu nyí tùɔ̀kɛ.

⁵We nnitipòkù kèríní dikpɑ́ɑ̀, kɛ pĩ́ nho dɑcɛ̃nnì? (Osɑpɑ̀ɑ̀ m̀bɛí ntì) N dɑ èntɛ mutie bɛ̀ tu mù pɔmmié mu fũ̀ɔ̃̀ ndi, ɑ yɔ̃ dɑ pùó ndɛ̀, ò dɑ pɛitɛ́ dɛ̀.

⁶N tɑnnɛ́ ɑ yɛ̀mmɛ̀ miɛkɛ kɛ̀ nní ntú ɑ kó mɛcɑnnimɛ̀, n kɑnnɛ ɑ borɛ̀, kɛ̀ nní ndònnɛ̀ bɛ̀ fìí ndìì tɑ̃́rì nɛ̀ ɑ kó diyètìrì, kɑ̀ɑ nni mpíkù ɑ nɔ̀ùtɛ̀ miɛkɛ. Mɛdɔ́kùmɛ̀ kpeńnìmu kɛ dònnɛ̀ mukṹṹ kɛ tii kɛ dònnɛ̀ kudɔnkù, kɛ cɔ́ú nfɛhɑ̃ɑ̃dɛɛ̀nfɛ̀ kɔ̃mɛ, kɛ dò nti Yiɛ̀ nKuyie nkó muhɑ̃ɑ̃́.

⁷Yɛbirɛ diɛyɛ̀ bɑ́ɑ́ nɑ kɛ́kuɔ ti kó mɛdɔ́kùmɛ̀ kó muhɑ̃ɑ̃́, tibinti kó mɛniɛ mbɑ́ɑ́ nɑ kɛ́ mù dɑ̀tínnɛ́. Kòò mɔù dènnɛ o cĩ́ɛ̃̀tɛ̀ kó tikpɑ̀tì timɔu kɛ wɑnti kɛ bo dontɛ́ mɛdɔ́kùmɛ̀ bɛ̀ yóó ò sènkɛ̀rìmu.

⁸Ti mɔkɛ ti tɑ̃ũ̀ mɔù nwe kòò kpɑɑ́ bɛ, ò mu nyí yɛ̀ yɛmɛ. Ti bo yĩ́mɛ ti tɑ̃ũ̀, bɛ̀ bo nnɑ́ɑ́ ndìì yiè o kó didɑkɛnyennì kpɛ́í?

⁹Kòò do ntú kuduotí nku ti nɑ mmɑɑ́ o ĩ́nkɛ̀ yɛdítísɔ̀rɛ̀ nyɛ, kòò do ntú dibòrì ndi ti nɑ nhò kpetínnɛ́mu kɛ pɑ́ɑ́ nsɛ́tìrì kó tidɑbɛɛtì.

¹⁰N tú kuduotí nku, kɛ̀ m mɛ tu yɛdèrɛ̀. Kòò n wùó nkɛ̀ dɛ̀ ò duɔ̀ ndiwɛ̀ì.