FƐCANYƐ̀NFƐ̀ 5:5-15

⁵Kɛ̀ n yítɛ́ní kɛ́mbo kpetɛ́ n dɑcɛ̃nnì, kɛ̀ n nɔ̀ùtɛ̀ dɑ̀ɑ́tí tùdɑ̀ɑ̀rí bɛ̀ tu wè míírì, kɛ̀ m pĩ́ ndicɑ̀ù kó yɛ̀bɑ̀kɛ̀ kòo yɛ̀ tòri.

⁶Kɛ̀ n kpetɛ́ n dɑcɛ̃nnì, kɛ nɛ́ nsɔ̃́ ndì pɛ̃ɛ̃tɛ́ bɑ́ dì í dɛ̀ kpɑɑ́, kɛ̀ n yɛroo di wɑmmù kɛ́ dì wɑmmú kɛ́mɔ́ntɛ́, kɛ́yú kɛ́yú, kɛ̀ dɛ̀ ndò nyúó.

⁷Kɛ̀ m mɑ́ɑ́nɛ̀ bɛhɛikɛ̀mbɑ̀rìbɛ̀ bɛ̀ɛ̀ bɑ̀ɑ̀ dihɛì, kɛ̀ bɛ̀ m puotí kɛ́ n kɔutɛ kɔutɛ, kɛ́bɑ́tɛ́ n yɑɑ̀bòrì. Bɛmbɛ bɛ̀ɛ̀ bɑ̀ɑ̀ dihɛì kó iduotí.

⁸N di bɑ́ɑ́mmu Sedisɑdɛmmu kó isɑpùmbí, kɛ̀ di mɑ́ɑ́nɛ̀ n dɑcɛ̃nnì n yɛ̀mmɛ̀ kpɛri, di bo dì nɑ̀kɛ́ kɛ yĩ́ bɑ? Dí dì nɑ̀kɛ́ kɛ́ yĩ́ n dì dɔ́mu kɛ̀ dɛ̀ tontɛ́ kɛ n dɔ̀ɔ̀ mumɔmmú.

⁹Kɛ̀ bɛ̀ dɔ̀: A dɔ́ wè ò mɔ̀kɛ bɑ kɛ̀ dɛ̀ pɛ̃ɛ̃tɛ́ bɛtɔbɛ̀? Fɔ̃́ nhoposɑ́ɑ́tì wèè pɛ̃ɛ̃tɛ́ bɛnitipòbɛ̀ bɛmɔu? A dɔ́ wè mɔ̀kɛ bɑ kɛ̀ dɛ̀ pɛ̃ɛ̃tɛ́ bɛtɔbɛ̀ kɑ̀ɑ ti bɑ́ɑ́ mmɛmmɛ o kpɛ́í.

¹⁰N dɑcɛ̃nnì tu tɛdɑhontɛ̀ ntɛ kɛ dò ndoii. Bɑ́ kɛ̀ bɛnìtìbɛ̀ bo tɛkɔupíítɛ̀ (1000), wè ncɑ̃́ɑ̃́ mbɛ miɛkɛ.

¹¹Kòo yuu pĩnti kɛ dò mmɛsɔɔ nsɑ̀ɑ̀mɛ̀. Kòo yùtì nɑmpú kukodɑyɔ́nkù kɔ̃mɛ kɛ sɔù kɛ dònnɛ̀ dikɑ̃kɑ̃ɑ̃̀.

¹²Kòo nuɔ ndònnɛ̀ fɛduonfɛ kpɛyi, fɛduonfɛ fɛ̀ɛ̀ bo mɛniɛ ntɑkɛ́, kɛ pɛ́i kɛ dò mbɛ̀ ì ɔ́únɛ̀ mɛnɑɑmiɛ̀, kɛ̀ fɛ̀ ompu mɛnɛ́sɑ̀ɑ̀mɛ̀ borɛ̀.

¹³Kòo bɑɑ dònnɛ̀ kupɛ̃ titieti fɔ̃ɔ̃ti buɔtí kùù ĩ́nkɛ̀, kòo bìɛ̀ ndònnɛ̀ mutepóó. Kɛ dò mmɛkùɔ̀ mmɛ̀ɛ̀ kɔkɛ́nɛ̀ tùdɑ̀ɑ̀rí.

¹⁴Kòò ũ mɛsɔɔ nkó dɛmɑ́mɑ́nnɛ̀ kɛ̀ dɛ̀ dɑ̀ri yɛtɑ̃́sɑ̀ɑ̀yɛ̀ bɛ̀ tu yɛ̀ sɑ̀fíírì, kòo pɔutì dònnɛ̀ yɛpɑ́pɑ́nìì bɛ̀ dɑ̀ri yɛ̀ yɛtɑ̃́sɑ̀ɑ̀yɛ̀ bɛ̀ tu yɛ̀ sɑ̀fíírì.

¹⁵Kòo tɑ̀ɑ̀kɛ dònnɛ̀ yɛtɑ̃́píɛ̀ kó fɛtofɛ, kɛ̀ fɛ tɑ̀rì tu mɛsɔɔ nsɑ̀ɑ̀mɛ̀. Kòo ììkɛ̀ wenni kɛ dònnɛ̀ kutúúkù Dimɑɑ kó dɛtie. Kɛ cɑ̃́ɑ̃́ nkɛ dònnɛ̀ dɛtie mbɛ̀ tu dɛ̀ sɛ́tìrì.