FƐCANYƐ̀NFƐ̀ 5:1-11

¹N tɑtimu n kũmpúú miɛkɛ, fɔ̃́ n tɑ̃ũ̀, m pocɛ̃nnì, kɛ bo tɔ̃ũ míírì nɛ̀ ɑdòmɑ́tì, kɛ́dinɛ̀ n ciètì kɛ́yɑ̃̀ n nɑɑ̀ ndifɛ̃́ɛ̃̀ nɛ̀ n nɑɑmiɛ̀. (Onitidɔ̀ù nɛ́pobɛ̀ bɛ́i ntì) N nɛ́pobɛ̀ yɑ̃nɛ̀ mɛdɔ́kùmɛ̀ kó mɛnɑɑ̀ nkɛ́muɔ́.

²N do yɛ̃̀ nkɛ́duɔ́mu kɛ̀ n yɛ̀mmɛ̀ nɛ́ nwúó, kɛ̀ n kèè n dɑcɛ̃nnì biemmɛ̀ dicɑ̀ù kɛ tú: (Onitidɔ̀ù bɛ́i ntì) ń kpetɛ́ n tɑ̃ũ̀, n cɑ̀ɑ̀, fɔ̃́ n kó fɛpoduonfɛ n kóo sɑpùnsɑ́ɑ́tì, n yuu diì dɑ̀ɑ́tí timɑɑ̀ntì, kɛ̀ n yùtì bùútɛ́nɛ̀ tiyenkɛ̀mmɑɑ̀ntì,

³M bɑ̀tɛ́mu n yɑɑ̀bòrì, m bɑ́ɑ́ nɑ kɛ́wɛ̃tɛ kɛ́ dì bɑ̀ɑ́tí! Nh ɔ̀útɛ́mu n nɑɑ̀cɛ̀i m bɑ́ɑ́ nɑ kɛ́wɛ̃tɛ kɛ́ sì sɑ̃ṹ,

⁴kɛ̀ n dɑcɛ̃nnì n yɛ̀mmɛ̀ kouu bɑɑní o nɔ̀ùtɛ̀ dicɑ̀ù kó mɛfíè. Kɛ̀ n kɔ̃m̀bùɔ̀tìi do.

⁵Kɛ̀ n yítɛ́ní kɛ́mbo kpetɛ́ n dɑcɛ̃nnì, kɛ̀ n nɔ̀ùtɛ̀ dɑ̀ɑ́tí tùdɑ̀ɑ̀rí bɛ̀ tu wè míírì, kɛ̀ m pĩ́ ndicɑ̀ù kó yɛ̀bɑ̀kɛ̀ kòo yɛ̀ tòri.

⁶Kɛ̀ n kpetɛ́ n dɑcɛ̃nnì, kɛ nɛ́ nsɔ̃́ ndì pɛ̃ɛ̃tɛ́ bɑ́ dì í dɛ̀ kpɑɑ́, kɛ̀ n yɛroo di wɑmmù kɛ́ dì wɑmmú kɛ́mɔ́ntɛ́, kɛ́yú kɛ́yú, kɛ̀ dɛ̀ ndò nyúó.

⁷Kɛ̀ m mɑ́ɑ́nɛ̀ bɛhɛikɛ̀mbɑ̀rìbɛ̀ bɛ̀ɛ̀ bɑ̀ɑ̀ dihɛì, kɛ̀ bɛ̀ m puotí kɛ́ n kɔutɛ kɔutɛ, kɛ́bɑ́tɛ́ n yɑɑ̀bòrì. Bɛmbɛ bɛ̀ɛ̀ bɑ̀ɑ̀ dihɛì kó iduotí.

⁸N di bɑ́ɑ́mmu Sedisɑdɛmmu kó isɑpùmbí, kɛ̀ di mɑ́ɑ́nɛ̀ n dɑcɛ̃nnì n yɛ̀mmɛ̀ kpɛri, di bo dì nɑ̀kɛ́ kɛ yĩ́ bɑ? Dí dì nɑ̀kɛ́ kɛ́ yĩ́ n dì dɔ́mu kɛ̀ dɛ̀ tontɛ́ kɛ n dɔ̀ɔ̀ mumɔmmú.

⁹Kɛ̀ bɛ̀ dɔ̀: A dɔ́ wè ò mɔ̀kɛ bɑ kɛ̀ dɛ̀ pɛ̃ɛ̃tɛ́ bɛtɔbɛ̀? Fɔ̃́ nhoposɑ́ɑ́tì wèè pɛ̃ɛ̃tɛ́ bɛnitipòbɛ̀ bɛmɔu? A dɔ́ wè mɔ̀kɛ bɑ kɛ̀ dɛ̀ pɛ̃ɛ̃tɛ́ bɛtɔbɛ̀ kɑ̀ɑ ti bɑ́ɑ́ mmɛmmɛ o kpɛ́í.

¹⁰N dɑcɛ̃nnì tu tɛdɑhontɛ̀ ntɛ kɛ dò ndoii. Bɑ́ kɛ̀ bɛnìtìbɛ̀ bo tɛkɔupíítɛ̀ (1000), wè ncɑ̃́ɑ̃́ mbɛ miɛkɛ.

¹¹Kòo yuu pĩnti kɛ dò mmɛsɔɔ nsɑ̀ɑ̀mɛ̀. Kòo yùtì nɑmpú kukodɑyɔ́nkù kɔ̃mɛ kɛ sɔù kɛ dònnɛ̀ dikɑ̃kɑ̃ɑ̃̀.