Föför 8:2-32

²Ekoch mwän mi tupwöl lon ar lükülük ra peiaseni Stefanus o ra ngüngüres won lon ar kechü fän leüömong.

³Nge Saul a popuetä le atala mwichefel. A feila ngeni imw me imw o etekinawu ekewe chon lükü, mwän me fefin, o atolongeer lon imwen fötek.

⁴Iwe, ekewe chon lükü mi toropasfeil ra fetalfeil ekis meinisin o afalafala ewe kapasen Kot.

⁵Nge Filip a feila lon eu telinimw lon Samaria o afalafala usun Kraist ngeni ekewe aramas ikenan.

⁶Lupwen ekewe aramas ra rongorong ngeni än Filip afalafal o küna ekewe manaman a föri, ir meinisin ra fokun aüseling ngeni mine a apasa.

⁷Ekewe ngününgau ra towu seni chomong aramas fän ar pupuchör mi leüömong, pwal chomong aramas mi mwök me aramas mi pechemä ra pöchökületä.

⁸Iei mine a fis eu watten pwapwa lon ewe telinimw.

⁹Iwe, a wor eman mwän itan Simon lon ewe telinimw. Ätei a amairü ekewe chon Samaria ren an föri angangen roong. A apasa pwe i eman aramas mi tekia

¹⁰o aramas meinisin lon ewe telinimw, seni ekewe aramas mi iteföüla tori aramas mi kis, ra fokun aüseling ngeni. Ra apasa, “Ätei ewe manamanen Kot, a pwä pwe i ewe Manaman mi Lap!”

¹¹Aramas ra fokun aüselinga, pun fansoun langatam a amairüür ren an föri angangen roong.

¹²Nge lupwen ra lükü än Filip afalafala ewe Pworaus Allim usun ewe Mwün Kot pwal usun Jesus Kraist, iwe, mwän me fefin ra papatais.

¹³Pwal Simon a lükü, nge mürin an papatais a chök nonom ren Filip. Nge lupwen a küna ekewe asisil mi lapalap me ekewe manaman Filip a föri, a fokun mairü ren.

¹⁴Iwe, lupwen ekewe soukünö lon Jerusalem ra rongorong pwe ekewe chon Samaria ra etiwa ewe kapasen Kot, ra tinala Petrus me Johannes rer.

¹⁵Lupwen ar toriir, ra iotek fän iten ekewe chon lükü Jesus, pwe pwal ir repwe angei ewe Ngünmifel,

¹⁶pun ewe Ngünmifel esamwo feitiu won eman me leir. Ra chök papatais ngeni iten ewe Samol Jesus.

¹⁷Mürin Petrus me Johannes ra iseis pöür wor, iwe, ra angei ewe Ngünmifel.

¹⁸Iwe, lupwen Simon a küna pwe Ngünmifel a tori chokewe ekewe soukünö ra iseis pöür wor, a mochen ngeni Petrus me Johannes moni

¹⁹o üra, “Oupwe pwal ngeniei ei manaman, pwe are ngang üpwe iseis pei won eman, epwe angei Ngünmifel.”

²⁰Nge Petrus a pölüeni, “Amwo en me noumw moni oupwe tolong lon hell, pun ka ekieki pwe ka tongeni möni än Kot lifang ren moni!

²¹Esap wor wisom are kinikinum lon ei angang, pun lelukom esap pwüng mwen mesen Kot.

²²Kopwe ekieksefäl seni om ei ekiek mi ngau o iotek ngeni ach Samol, pwe i epwe amusala ei sokun ekiek mi nom lon lelukom.

²³Pun üa küna pwe en ka fokun uren lolowo, ka pwal fötek ngeni tipis.”

²⁴Mürin Simon a üreni Petrus me Johannes, “Ouse mochen oupwe iotek ngeni ewe Samol fän itei, pwe esap wor och lein ekei mettoch oua kapas usun epwe fis ngeniei.”

²⁵Iwe, wesin än Petrus me Johannes pwärätä Jesus o apworausa än ewe Samol kapas, ra liwinsefäliti Jerusalem. Lupwen ar sai ra afalafala ewe Pworausen Manau lon chomong sopw me lon Samaria.

²⁶Iwe, eman nöün ewe Samol chon läng a üreni Filip, “Kopwe amolokotä o feila peliör won ewe al mi feila seni Jerusalem tori Kasa, ei al esap wor eman aramas a fetal won.”

²⁷Iei mine Filip a feila, nge won ewe al a churi eman re Itiopia, i eman ätelipich mi reirei, eman nöüwis mi tekia nöün ewe kiwin Kantake seni Itiopia, a tümwünü pisekin mi aüchea me nöün moni meinisin. Ei mwän a feila Jerusalem pwe epwe fel ngeni Kot,

²⁸nge iei a liwiniti lenian, a mot won waan woken o aleani puken ewe soufos Aisea.

²⁹Iwe, Ngünmifel a üreni Filip, “Kopwe feiliti ewe woken o ouwärer ngeni le fetal.”

³⁰Mürin Filip a sä ngeni o a rong pwe ewe nöüwis a aleani seni puken ewe soufos Aisea. Iwe, a aisini, “Ka weweiti mine ka aleani?”

³¹Ewe nöüwis a pölüeni, “Epwe ifa usun ai üpwe tongeni weweiti nge esap wor eman a awewe ngeniei?” Iwe, a tüngor ngeni Filip pwe epwe tötä o mot ren won ewe woken.

³²Ikei ekewe wokisin ewe nöüwis a aleani, “I a usun eman sip aramas ra emwenala pwe epwe ninnila, a usun eman nienifön sip a fanafanala lupwen ar fichi ünan. Esap apasa eu kapas.