Föför 7:43-59

⁴³Apwi! Ämi oua ekifetalei ewe imwenfel seni mangaku än ewe kot Molok, pwal ewe uluulun Refan, ämi we koten fü. Iei ekewe uluulun anümwäl ämi oua föriir pwe oupwe fel ngeniir. Iei mine üpwe tinikemiila pekilan Papilon pwe oupwe oola.’

⁴⁴“A wor ren ach kewe lewo me lon ewe fanüapö ewe imwenfel seni mangaku. A för usun chök met Kot a aiti ngeni Moses lon liosun we a fen pwäri ngeni me mwan.

⁴⁵Iwe, mürin ach kewe lewo mi angei ewe imwenfel seni mangaku seni semelaper kewe ra eki ei imwenfel lupwen ra eti Josua le feila o liapeni ewe fanü seni chon ekewe mwü Kot a fen asürela me mwer. Iwe, a nonom lon ewe fanü tori fansoun Tafit.

⁴⁶Tafit a küna chen me ren Kot o a tüngor ngeni an epwe mwüt ngeni, pwe epwe aüetä eu imwenfel fän iten än Jakop we Kot.

⁴⁷Nge Salomon ätewe mi aüetä ewe imwenfel fän itan.

⁴⁸Nge ewe Kot mi Unusen Tekia esap nom lon imw mi för ren pöün aramas. Usun ewe soufos a apasa,

⁴⁹‘Ewe Samol a apasa: Läng ai lenien motun samol, nge fanüfan lenien puun pechei. Met sokun imw oupwe aüetä fän itei? Ia a nom ie ewe leni üpwe nom lon?

⁵⁰Ifa usun, sap püsin ngang üa föri ekei mettoch meinisin?’”

⁵¹Iwe, Stefanus a sopwela le kapas ngeniir, “Ämi aramas mi tipeförea! Letipemi ra usun chök chokewe resap lükü Kot, oua rongomang ngeni kapasen Kot! Ämi oua usun chök ämi kewe lewo: Pwal ämi oua ü ngeni Ngünmifel fansoun meinisin.

⁵²Ifa usun, mi wor eman soufos ämi kewe lewo resap ariaföüü? Ra niela nöün Kot kewe chon künö, chokewe ra arongato me lom usun waren nöün Kot we Chon Angang mi pwüng. Iwe, iei ämi oua afangamä i o niela.

⁵³Ämi chokewe mi angei än Kot kewe Allük mi feito me ren ekewe chon läng, nge ämi ousap aleasochis ngeni!”

⁵⁴Iwe, lupwen chon ewe mwichen soupwüng ra rongorong ngeni än Stefanus afalafal, ra fokun lingeringer o asüngürü ngiir lon ar song.

⁵⁵Nge Stefanus a uren Ngünmifel, a anetai mesan ngeni läng o a küna lingen Kot me Jesus mi ütä lepelifichin Kot.

⁵⁶Iwe, a üra, “Nengeni, üa küna pwe läng a suk o Nöün Aramas a ütä lepelifichin Kot!”

⁵⁷Lupwen ra rong ekei kapas, ra pinela selinger ngeni pöür o pupuchör fän leüömong. Iwe, ir meinisin ra rangeiti Stefanus,

⁵⁸ra etekinawu lükün ewe telinimw o popuetä le monei ngeni fau. Nge ekewe chon atutur ra isenatiu üfer kewe ren eman alüal itan Saul.

⁵⁹Iwe, lupwen ar momonei Stefanus ngeni fau, i a kökkö lon an iotek ngeni ewe Samol, “Ai Samol Jesus, kopwe etiwa ngüni!”