Föför 27:10-39

¹⁰“Ämi mwän kana, üa küna pwe ach ei sai seni ikei epwe afeiengau, sap chök ren talan waach ei sip me uttenan, nge epwe pwal wor mi mäla.”

¹¹Nge ewe meilapen sounfiu a lükü alon ewe pölü me alon ewe souwa, nge esap lükü alon Paulus.

¹²Ewe lenien ilen sip esap öch ar repwe mamaram ikenan tori lesopolan lefen. Iei mine chomong me lein ekewe mwän ra tipeeu ngeni ar repwe sai seni ikenan o ra sotuni ika repwe tori Föniks pwe repwe mamaram ikenan. Föniks eu lenien ilen sip lon Kreta mi sape ngeni lotou-ör me lotou-äfeng.

¹³Iwe, lupwen och kükün asepwäl seni ör a popuetä le enito, ekewe mwän ra ekieki pwe ra tongeni afisi mine ra akota. Iei mine ra efietä ewe angkö o seresila fokun kan ngeni chök ewe fanü Kreta.

¹⁴Nge a müttir fis, pwe eu asepwäl mi fokun pöchökül itan “Ötiu-äfeng” a enito seni ewe fanü.

¹⁵A weneiti ewe sip, nge pokiten ewe sip esap tongeni sai ngeni ewe mölümöl, aia chök likiti ngeni ewe mölümöl pwe aipwe maanula ren.

¹⁶Iwe, aia ekis chuno lupwen aia saila örün ewe kükün fanü Kauta. Ikenan aia anükünükü timan ewe sip, nge fän weires chök.

¹⁷Ra efietä ewe tima won ewe sip, mürin ra pweli ünükün ewe sip ngeni säl. Iwe, ra niuokus pwe repwe fanatä won petepeten arosetin Lipia, iei mine ra aürätiu ewe amara o mamaanula ren ewe asepwäl.

¹⁸Iwe, ewe mölümöl a chök soposopola, iei mine sorotän ewe rän ra popuetä le aturätiu uttenen ewe wa leset,

¹⁹nge pwal eu rän mürin ra aturätiu pisekin ewe sip.

²⁰Lon chomong rän aisap tongeni küna akkar ika fü kana, nge ewe mölümöl a chök pöchökül le enitikem. Iwe, esap chüen wor äm apilükülük pwe aipwe manau.

²¹Iwe, fansoun langatam ekewe aramas resap mongö och, mürin Paulus a ütä me mwer o apasa, “Ämi mwän kana, epwe fen öch ika oupwe aüseling ngeniei pwe sisap sai seni Kreta. Pun ika itä oupwe aüseling ngeniei sisap tolong lon ei watten osukosuk me feiengau.

²²Nge iei üa tüngor ngenikemi, pwe oupwe apilükülüköch, pun esap wor eman me leich epwe mäla, nge ei chök sip epwe tala.

²³Pun lepwin ewe eman nöün Kot chon läng, ewe Kot üa nonom fän nemenian o üa angang ngeni, a feito rei

²⁴o üreniei, ‘Kosap niuokus Paulus! Kopwe fokun ütä me mwen ewe Sisar. Nge Kot, lon an kirikiröch epwe pwal amanaua chokewe meinisin mi etuk lon ei sai.’

²⁵Iei mine ämi mwän, oupwe apilükülüköch! Pun üa lükü Kot, pwe epwe fis usun mine a üreniei.

²⁶Nge sipwe fokun pasetä won wochen eu fanü.”

²⁷Iwe, a iei engol me rüanü pwin aia mamaanfeil lon ewe matau watte itan Mediteranean ren ewe mölümöl. Ina epwe lukenipwin ekewe säla ra mefi pwe aia arap ngeni fanü.

²⁸Iei mine ra esenätiu efoch säl mi wor ochou won, iwe, ra küna alololun ewe ie ükükün ipükü rüe fit. Ekis fansoun mürin ra pwal aüküsefäli o küna pwe a chök tiwe fit alololun.

²⁹Iwe, ra niuokus pwe ewe sip epwe fanatä won woch. Iei mine ra aturatiu fofoch angkö me mürin, iwe, ra iotek pwe epwe ränila.

³⁰Mürin ekewe säla ra sotuni ar repwe sü seni ewe sip. Ra aturätiu ewe tima lon ewe sät, nge ra tipin esenätiu ekoch angkö seni me mwen ewe sip.

³¹Nge Paulus a üreni ewe meilapen sounfiu me ekewe sounfiu, “Are ekei säla resap nonom won ei wa, esap wor ämi apilükülüköch pwe oupwe manau.”

³²Iei mine ekewe sounfiu ra pökü ekewe säl mi riri ngeni ewe tima pwe a maanula.

³³Me mwen an epwe ränila, Paulus a tüngor ngeniir meinisin pwe repwe mongö och. A üra, “A ükükün engol me rüanü pwinich iei ach sia witiwiti lon, nge ei ükükün fansoun ousap fokun mongö och.

³⁴Üa tüngor ngenikemi pwe oupwe mongö. A lomot ngenikemi, pwe oupwe tongeni manau. Pun esap fokun mwo nge emet meten möküremi epwe turula.”

³⁵Iwe, wesin an apasatä ekei kapas, Paulus a angei ekis pilawa o iotekin kilisou ngeni Kot won mwer meinisin. A kinikisietiu o a popuetä le mongö.

³⁶Mürin ir meinisin ra popuetä eäni apilükülüköch o ra pwal püsin mongö.

³⁷Iwe, ükükün chochon wam we ruopükü fik me wonoman.

³⁸Mürin äm meinisin aia mötüla, ra aturätiu ekewe wiich meinisin le matau, pwe wam we a pwasetä.

³⁹Iwe, lupwen a ränila, ekewe säla resap tongeni asilla ewe fanü. Nge ra küna eu nomolong mi wor pian, iei mine ra ekiekietä pwe ika epwe tufich repwe afanatä ewe wa won.